2012 թվականի երկու ամիսներին բանակում գրանցված մահվան 8 դեպքերը Հայաստանի նման փոքր երկրի համար խիստ մտահոգիչ են: «Առաջին լրատվական»-ի հետ զրույցում այս մասին ասաց «Լրագրողներ հանուն մարդու իրավունքների» ՀԿ նախագահ Ժաննա Ալեքսանյանը:
«Բանակում մահվան դեպքերի կանխարգելմանն ուղղված ՊՆ ձեռնարկած միջոցառումներն արդյունավետ չեն, Զինված ուժերում վերահսկողություն չի իրականացվում: Եթե հենակետերում ուղղակի վերահսկողություն, սպայական կազմի ներկայություն լիներ, չեմ կարծում, որ մահվան դեպքերն այսքան կշատանային: Բանակում վերահսկողությունն ու կամքն են պակասում: Մյուս, հիմնական հանգամանքն անպատժելիության մթնոլորտն է, մինչ օրս բանակում եղած դեպքերը չբացահայտելը: Ասվածի վառ օրինակը փետրվարի 29-ին տեղի ունեցած դեպքն է, երբ միայն երեկ պարզ դարձավ, որ զինվորը մահացել է խոշտանգումների ենթարկվելուց հետո, բայց քրեական գործը հարուցվել է ինքնասպանության հոդվածով: ԶՈւ պատասխանատուները չեն ուզում բացահայտել նախորդ դեպքերը, որպեսզի կանխվեն հետո հաջորդող հանցագործությունները»,- ասաց Ժաննա Ալեքսանյանը:
Նրա խոսքով՝ հայկական բանակը վերջին երկու տարիներին միջազգային ամենատարբեր կազմակերպությունների ուշադրության կենտրոնում է հայտնվել: «Սա աննախադեպ է: ԵԽ մարդու իրավունքների հանձնակատար Թոմաս Համարբերգը բանակում իրավիճակը շտկելու ուղղությամբ կոնկրետ առաջարկ էր արել, հանդիպումներ էր ունեցել Պնախարարի հետ, սակայն եթե բանակում մահվան դեպքերը շարունակվում են, նշանակում է, որ եվրոպացի պաշտոնյաների առաջարկները ոչ մի կերպ չեն ազդում: Ի՞նչ կարող է անել միջազգային հանրությունը մեր երկրի համար: Նրանք չեն կարող ավելի շատ մտածել բանակում գրանցվող մահվան դեպքերի մասին, քան մենք: Մենք պետք է փոփոխություններ անենք, հենց ՊՆ-ը պետք է զբաղվի հանցագործությունները կանխելու գործով»,- ասաց «Լրագրողներ հանուն մարդու իրավունքների» ՀԿ նախագահը:
Նշենք, որ այս տարվա երկու ամիսների ընթացքում Հայաստանի զինված ուժերում գրանցվել է մահվան 8 դեպք: Մահացած 8 զինվորներից երեքը, ըստ պաշտոնական վարկածի, ինքնասպան են եղել, մեկը սպանվել է: Մի զինվոր զոհվել է հրադադարի ռեժիմի խախտման հետևանքով, մեկը` արձակուրդի ժամանակ վթարի, երրորդը` թոքաբորբի, չորրորդը` զենքի հետ վարման կանոնների խախտման հետևանքով:
Վերջին` ութերորդ դեպքը, գրանցվել է երեկ: Զորամասերից մեկում մահացել է շարքային զինծառայող, Աբովյան քաղաքի բնակիչ Տիգրան Վարյանը: Արդեն հարուցվել է քրեական գործ ինքնասպանության հասցնելու մեղադրանքով:
