«Առաջին լրատվականը» երեկ գրել էր, որ Թուրքիայի վարչապետ Ռեջեփ Թայիփ Էրդողանը պաշտոնական այցով գտնվում է Քուվեյթում: Քուվեյթի մայրաքաղաքում երկրի ղեկավար Շեյխ Ֆահադ Ալ-Ահմադի կողմից նա ստացել է «Իսլամական աշխարհի վառ անհատականություն» մրցանակը: Այս մասին հաղորդում է The World Bulletin հանդեսը:
Ելույթի ժամանակ Թուրքիայի վարչապետն անդրադարձել է պաղեստինյան հիմնահարցին` «ծովահեն պետություն» անվանելով Իսրայելը:
«Մենք չենք կարող կույր ձևանալ այն ժամանակ, երբ Իսրայելի ձեռքով սպանվում են պաղեստինցիներ, երբ ծովահենային գործողություններ են իրականացվում Միջերկրական ծովում` սպանելով 9 թուրքի, և երբ ելակի պարտեզներում, դպրոցներում, խաղահրապարակներում և հիվանդանոցներում սպանվում են երեխաներ, կանայք ու ծերեր: Մենք չենք կարող և չպետք է լռենք»,- ասել է Էրդողանը: