Ադրբեջանական APA լրատվական գործակալության փոխանցմամբ` Ադրբեջանի արտգործնախարար Էլմար Մամեդյարովն այսօր ելույթ է ունեցել Բաքվում կազմակերպված Իսլամական համագործակցության կազմակերպության (ԻՀԿ, նախկին ԻԿԿ) «ուղեղային կենտրոնների» 3-րդ ֆորումում, որում անդրադարձել է Ղարաբաղյան հակամարտության կարգավորմանը.
«Մենք կարողացել ենք լավ հարաբերություններ հաստատել մեր հարևանների հետ: Սակայն կա պատճառ, որը խանգարում է մեր տարածաշրջանի զարգացմանը: Դա Ղարաբաղյան հակամարտությունն է: Ցավոք, բանակցային գործընթացում այդպես էլ չգրանցվեց առաջընթաց: Պատճառն այն է, որ Հայաստանը ձգտում է պահպանել ստատուս-քվոն: Այդ հակամարտությունը պետք է կարգավորվի խաղաղ ճանապարհով:
Շփման գծում կողմերի միջև հեռավորությունը երբեմն հասնում է 60 մետրի, ինչն առաջացնում է անվտանգության հետ կապված անհանգստություն: Ես հասկանում եմ, որ երբ առաջիկայում սպասվում են ընտրություններ, երբեմն հեշտ չի լինում բանակցություններ վարելը: Հայաստանում ընտրություններ են սպասվում: Հեշտ չի լինելու, սակայն մենք պատրաստ ենք օգտագործել բոլոր հնարավորությունները, որպեսզի չձգձգվեն խաղաղության բանակցություններն ու համաձայնագրի կնքումը:
Ադրբեջանը հանդես է գալիս կողմերի միջև վստահության մթնոլորտ ձևավորող միջոցների օգտին: Մենք ելնում ենք սովարական տրամաբանությունից. կողմերի միջև պատերի կառուցումն անարդյունավետ է: Միջազգային հանրությունը նույնպես հակված է այդ տրամաբանությանը»: