Գրքերի թանկացումը հնարավոր է նաև լավ արձագանք ունենա. այսօր «Առաջին լրատվական»-ի հետ զրույցում նման տեսակետ հայտնեց երիտասարդ գրող Արփի Ոսկանյանը` խոսելով գրողների շրջանում առաջացած բողոքի ալիքի մասին:
Նա դրական համարեց այն, որ գրքի մասին երկար ժամանակ չէր խոսվում, իսկ այս ամենի արդյունքում սկսեցինք գրքի մասին խոսել:
«Այսինքն` դա միանշանակ չէ, որ միայն վատ անդրադարձ կունենա այս ոլորտի և գրահրատարակչության վրա: Խնդիրներն այսօր բարձրացվում են: Ես կարծում եմ, որ «Ուլիսես»-ի փորձը ցույց տվեց, որ թանկ գիրքը կարող է նաև ավելի լավ վաճառվել, այսինքն` մեր հասարակության մեջ կա սնոբական մի հատված, որը պատրաստ է վճարել այն գրքի համար, որը թանկ է, և չվճարել այն գրքի համար, որն էժան ու մատչելի է»,- մեկնաբանեց իր տեսակետը երիտասարդ գրողը` հավելելով, որ պետք է պայքարել, բայց կարծիք հայտնելով, որ այս պայքարի մեջ արհեստական բան կա:
Նշենք, որ Արփի Ոսկանյանը չի միացել այն գրողներին, ովքեր երեկ նամակ դիմում են հանձնել կառավարության շենք` ուղղված վարչապետին:
