Ազգային ժողովում իրենց գործընկերների փոխարեն քվեարկող պատգամավորները պետք է ենթարկվեն վարչական և քրեական պատասխանատվության: Նման առաջարկ դաշնակցական պատգամավորները ներկայացրել էին՝ կապված ԱԺ-ում էթիկայի հանձնաժողովի ձևավորման համար մի շարք օրենքներում փոփոխություններ կատարելու հետ: Սակայն, ինչպես այսօր ԱԺ նիստում հայտարարեց ԱԺ պետական-իրավական հարցերի մշտական հանձնաժողովի նախագահ Դավիթ Հարությունյանը, իրենց կարծիքով, պատգամավորի համար ավելի ազդեցիկ է, երբ այդ վարքը էթիկայի հանձնաժողովում է քննարկվում, զեկուցվում ԱԺ-ում և տեղադրվում կայքում:
«Վարչական տուգանքի ենթարկելու դեպքում մտքիս չի գալիս, թե որ մարմնին ենք լիազորելու»,- ասաց Դ. Հարությունյանը՝ շեշտելով, որ առաջին անգամ մտցվում է քաղաքական պատասխանատվություն, որն ավելի լուրջ միջոց է, քան վարչականը:
ՀՅԴ պատգամավոր Արծվիկ Մինասյանը համոզվածություն հայտնեց, որ այլ անձի փոխարեն քվեարկելը պետք է պատժվի օրենքով. «Ելնելով մեր իրականությունից՝ կարծում ենք, որ սա պետք է պատժելի լինի»: Ա. Մինասյանը հարցադրում արեց՝ ինչո՞ւ համապետական ընտրությունների ժամանակ այլ քաղաքացու փոխարեն քվեարկելը դիտվում է օրենքի խախտում, իսկ երբ ընտրողների անունից պատգամավորն է ուրիշի փոխարեն քվեարկում, դա պատասխանատվության չի ենթարկվում:
«Ի՞նչ կասեք այն մարդկանց մասին, որոնց օբյեկտիվներն են ֆիքսել, որ քվեարկում են գործընկեր պատգամավորի փոխարեն, նրանց հարցնում են, ասում են՝ ես չեմ քվեարկել: Էլ ի՞նչ քաղաքական պատասխանատվության մասին է խոսքը»,- հայտարարեց Ա. Մինասյանը:
