«Ժառանգություն» կուսակցությունն այսօր հաղորդագրություն է տարածել 2008թ. Մարտի 1-ի իրադարձությունների հետ կապված:
Ստորև ներկայացնենք այն.
«Այսօր նորանկախ Հայաստանի պատմության մեծագույն ողբերգություններից մեկի` Մարտի 1-ի չորրորդ տարելիցն է: Քաղաքացու իրավունքներն ու ազատությունները երաշխավորելու համար կոչված իշխանությունը խլեց խաղաղ հանրահավաքում ընդդեմ ընտրությունների արդյունքների կեղծման իրենց բողոքն արտահայտող քաղաքացիներից 8-ի և բանակի ապօրինի ներգրավման արդյունքում ևս 2 զինվորականի կյանքը: Հանուն մի քանի իշխանավորների աթոռներն անսասան պահելու և դրանք յուրայիններին փոխանցելու` գործող վարչակարգը հարյուրավոր քաղաքացիների պատճառեց մարմնական, այդ թվում` հրազենային վնասվածքներ:
2008-ից չորս տարի անց մարտիմեկյան զոհերի հարազատների ցավը մնում է չամոքված, ոճիրի պատասխանատուները տակավին չեն կանգնել արդարադատության առջև: Ոճիրը հետաքննող միջազգային ատյանների ճնշման ներքո ձևավորված Փաստահավաք խմբի աշխատանքների դադարեցումը հստակ ցույց տվեց մարդասպաններին բացահայտելու` իշխանության քաղաքական կամքի բացակայությունը:
Իսկ վերջերս կառավարության կողմից Ազգային ժողով բերված օրենքի նախագծով նման դեպքերում բանակի հակասահմանադրական ներգրավումն օրինականացնող փաստաթուղթը ակնհայտ է դարձնում հետագայում ևս հակապետական այսօրինակ գործողությունները կրկնելու` իշխող կոալիցիայի անսքող մտադրությունը:
«Ժառանգությունը» սգում է Մարտի 1-ի զոհերի հարազատների հետ միասին` հայտարարելով, որ մինչև վերջ պահանջելու է հանցագործության բացահայտումը և հետամուտ է լինելու, որպեսզի խնդրի արդարացի հանգուցալուծումը դառնա նոր իշխանության առաջնահերթություններից մեկը:
Մարտի 1 իրագործած և մինչ օրս մարդասպաններին պարտակող իշխանություններին ժողովուրդը պետք է հեռացնի: Սա է օրվա պատվիրանն ու հրամայականը»:
