Գերմանական ԶԼՄ-ները քննարկում են երկրի նախկին նախագահ Քրիստիան Վուլֆին տարին 200 հազար եվրոյի չափով ցմահ թոշակ նշանակելու մասին փետրվարի 29-ին ընդունված որոշումը:
Թերթերը և հեռուստաալիքներն այդ թեմայով սոցհարցումներ են անցկացնում, փորձագետները նշում են, թե ինչ պետք է անի Վուլֆը` ընդունի՞, թե՞ մերժի: «Ես կուզենայի, որ դաշնային նախկին նախագահ Քրիստիան Վուլֆը բավական խելացի գտնվեր և հրաժարվեր պատվավոր թոշակից: Այդ կերպ նա կկարողանար գերմանացիների մոտ վերադարձնել իր կորցրած հարգանքն ու վստահությունը»,- Գերմանիայի նախկին նախագահ Վալտեր Շեելի խոսքերն է մեջբերում РИА Новости-ն: Նա, ի թիվս Գերմանիայի նախկին 4 նախագահների, ստանում է այդ պատվավոր թոշակը:
Երկրի քաղաքացիների մեծ մասը` 78 %–ը, համաձայն Emnid հետազոտական կենտրոնի հարցումների, դեմ է արտահայտվել նման թոշակին: Քաղաքացիների միայն 19 %–ն է դա ճիշտ համարում:
Վուլֆը հրաժարական էր տվել փետրվարի 17-ին, հայտարարելով, որ քաղաքացիների կողմից համապատասխան աջակցություն և վստահություն չունի, այդ իսկ պատճառով այլևս չի կարող այդ պաշտոնում մնալ: Հաննովերի դատախազությունը հետաքննություն է անցկացնում նախկին նախագահի հանդեպ: Նրան մեղադրում են ծառայողական դիրքի չարաշահման և ֆինանսական շահույթ ստանալու մեջ:
