Reuters գործակալության փոխանցմամբ՝ Դուբայի Noor Islamic Bank-ը Վաշինգտոնի ճնշմամբ դադարեցրել է Իրանի հետ գործարար հարաբերությունները: Այս մասին հայտարարել են ԱՄԷ-ի պաշտոնական ներկայացուցիչներն ու բանկի աղբյուրը:
Դրանով իսկ հաստատվեց ամերիկյան Wall Street Journal-ի ոչ վաղ անցյալում հրապարակած այն տեղեկատվությունը, որ Դուբայի բանկն իրանական բանկերի հետ հարաբերությունները խզել է դեռևս դեկտեմբերին:
Wall Street Journal-ի պնդմամբ՝ Noor Islamic Bank-ը իրանական նավթի վաճառքից ստացվող միջոցների գլխավոր աղբյուրն էր: Noor Islamic Bank-ը մասամբ պատկանում է Դուբայի էմիրությանը և դարձել է ԱՄԷ-ի առաջին ֆինանսական հիմնարկը, որը խզել է Իրանի հետ հարաբերությունները:
Հիշեցնենք, որ արդեն 2 ամիս է, ինչ ԱՄՆ նախագահ Բարաք Օբաման ստորագրել է մի օրենք, որով ԱՄՆ-ն ամբողջովին խզում է իր հարաբերություններն այն հիմնարկների հետ, որոնք համագործակցում են Իրանի Կենտրոնական բանկի հետ, ինչը բազմաթիվ երկրների համար անհնար է դարձրել իրանական նավթի գնումը:
