Այսօր լրագրողների հետ հանդիպմանը Ինֆորմացիոն տեխնոլոգիաների ձեռնարկությունների միության գործադիր տնօրեն Կարեն Վարդանյանն անդրադարձավ էլեկտրոնային առևտրի ոլորտում առկա խնդիրներին. «Ինտերնետն այսօր ամբողջությամբ փոխել է մեր կենցաղը, և կարծում եմ, որ մեծ փոփոխություններ կարող են լինել էլեկտրոնային առևտրի դաշտում: Մեր հասարակությունը նույնպես, զարգացած երկրների նման, կարող է օգտվել էլեկտրոնային առևտրի հնարավորություններից»,- նշեց Կարեն Վարդանյանը:
Նրա հավաստմամբ՝ այսօր Հայաստանի էլեկտրոնային առևտրի ներդրումն անհրաժեշտ է զարգացնել երեք ուղղությամբ. «Առաջինը էլեկտրոնային առևտուրն է Հայաստանի ներսում, ինչը շրջաններին կարող է հնարավորություն տալ օգտվելու երկրի ներքին առևտրից: Դա կարևոր է երկրի հավասարաչափ զարգացման համար:»
Հաջորդ կարևոր խնդիրներն են արտադրանքի արտահանումն ու ներկրումը. «Այսօր շեշտը հատկապես դրվում է ձեռագործական կամ փոքր ծավալի արտադրանքի արտահանմանը, բայց կարևոր է նաև մտավոր ռեսուրսի արտահանումը: Դրա շնորհիվ մեր մասնագետները կարող են իրենց հմտությունները, խորհրդատվությունը վաճառել էլեկտրոնային ձևով»:
ՀՀ էկոնոմիկայի նախարարի խորհրդական Վահե Դանիելյանն էլ խոսելով էլեկտրոնային առևտրին առնչվող խնդիրների մասին՝ նշեց, որ իրենք առանձնացրել են խնդիրների 9 խումբ, որոնք ներառում են օրենսդրական, մաքսային, հարկային և վճարահաշվարկային համակարգին վերաբերող հարցեր:
Օրենսդրական դաշտում կարևոր խնդիր է թերևս էլեկտրոնային առևտրի սահմանումը: «Անմիջականորեն կատարվող առևտուրը օրենսդրորեն բավականին լավ ձևակերպված է: Դա իրականացվում է առևտրային տարածքներում, որտեղ անմիջականորեն շփվում են գնորդն ու վաճառողը: Մինչդեռ էլեկտրոնային դաշտում այդ հարաբերությունները միջնորդավորված են: Ուստի պետք է տալ օրենսդրական ձևակերպում վիրտուալ առևտրի համար, որպեսզի տնտեսվարողները խնդիրներ չունենան»,- ասաց Վահե Դանիելյանը։
