Մարտի 3-ին Մաշտոցի պուրակում տեղի կունենա շուրջ 2 ժամ տևողությամբ «Ինքնորոշված քաղաքացու ծնունդը Մաշտոցի պուրակում» խորագրով խոշոր բնապահպանական ֆորում:
Մարտի 3-ին լրանում է Մաշտոցի պուրակում ընթացող քաղաքացիական պայքարի 22-րդ օրը: Այս օրերի ընթացքում չնայած այգու պաշտպաններին հաջողվել է կասեցնել պուրակում ծավալվող ապօրինի շինարարական աշխատանքները և խնդիրը բերել իրավական հարթություն, այնուհանդերձ քաղաքապետարանի կողմից շինարարությունը դադարեցնելու, կրպակներն ու սրճարանի ընդլայնված հատվածը ապամոնտաժելու և պուրակը բարեկարգելու վերաբերյալ պաշտոնական որոշում չի ընդունվել:
Բնապահպան-ակտիվիստները, քաղաքացիական նախաձեռնությունները քաղաքային իշխանություններից պահանջում են ապամոնտաժել հանրային տարածքում տեղադրված կրպակներն ու սրճարանի ընդլայնված հատվածը, վերականգնել հանրային տարածքը՝ ի շահ հանրային սեփականության իրավունքի:
«Յուրաքանչյուր ոք, ով միանում է այս պահանջին, մարտի 3-ին` ժամը 15.00-ին Մաշտոցի պուրակում իր ֆիզիկական ներակայությամբ կարող է ապացուցել, որ հանրային սեփականության համար մղվող պայքարի թիկունքին իսկապես կանգնած է հանրությունը՝ ի դեմս Հայաստանի Հանրապետության ինքնորոշված քաղաքացու:
Ֆորումի ընթացքում կքննարկվեն մեր երկրում առկա բնապահպանական, հանրային ունեցվածքի և սեփականության հարցերը՝ հիմք ընդունելով մեր սահամանադրական իրավունքները: Կներկայացվեն հանքարդյունաբերության, մասնավորապես Թեղուտի, Քաջարանի, Ջերմուկի, հանրային կանաչ տարածքների, շրջակա միջավայրի վրա ազդեցության փորձաքննության օրինագծի հետ կապված խնդիրները և դրանց լուծման հնարավոր եղանակները:
Մեր մասնակցությամբ ապացուցենք, որ մենք ենք տերը հանրային սեփականություն հանդիսացող տարածքի և մեր սահմանադրական իրավունքների: Հիշենք, որ հանրային ուղղորդման և ծանր ճնշման պարագայում ապամոնտաժումն և իրավունքների վերականգնումը անխուսափելի է: Ուստի, մարտի 3-ին` ժամը 15.00-ին բոլորս դեպի Մաշտոցի պուրակ»,- նշված է բնապահպան-ակտիվիստների հայտարարության մեջ:
