«Նոյյան Տապան» իմիտացիոն համալիրին դեմ եմ: Այսօր «Առաջին լրատվական»-ի հետ զրույցում նման տեսակետ հայտնեց ճարտարապետ, «ՈւրբանԼաբԵրևան»-ի ներկայացուցիչ Սարհատ Պետրոսյանը`անդրադառնալով «Հաղթանակ» զբոսայգու հարակից ժայռաբեկորների ծառազուրկ բարձունքին կառուցվելիք «Նոյյան Տապան» համալիրի նախագծին: Ս. Պետրոսյանը մտահոգություն հայտնեց համալիրի տեղի և դիրքի վերաբերյալ: Ըստ նրա` այդ տեղում չափազանց անընդունելի է նման համալիր կառուցելը:
«Իմիտացիոն կառույցները, ինչպիսին Մադամ Տյուսոյի թանգարանը, ինձ դուր չեն գալիս, բայց ես ինձ իրավունք չեմ վերապահում կարծիք հայտնել դրա վերաբերյալ: Պարզապես պրիմիտիվ մոտեցում կա այդ ամենի մեջ, ծիծաղելի մոդելները թուլացնում են այն կարևոր գաղափարը, որը դրված նախագծի հիմքում»,- նշեց Ս. Պետրոսյանը: Սակայն նա դրական գնահատեց նախագծի հեղինակների քննարկումների և կարծիքներ լսելու պատրաստակամությունը: Նրա խոսքով` նման մոտեցում շատ հազվադեպ է հանդիպում:
Սարհատ Պետրոսյանը տեղեկացրեց, որ նախագծի վերաբերյալ ճարտարապետների շրջանում քննարկում է եղել: «Քննարկմանը մասնակից ճարտարապետների մեծամասնությունը գրեթե միաձայն բացասական կարծիք է հայտնել, ես մասնակցել եմ և իմ բացասական դիրքորոշումը հայտնել եմ նախագծի վերաբերյալ»,- նշեց Ս. Պետրոսյանը`հավելելով, որ Հանրային խորհրդի մշակույթի ենթահանձնաժողովի քննարկման ժամանակ դեմ կարծիք չի եղել, քանի որ քննարկմանը ներկա չեն եղել ճարտարապետներ: Ճարտարապետ Սարհատ Պետրոսյանը կարծում է, որ քննարկումների արդյունքում նախագիծը կյանքի չի կոչվի:
Հիշեցնենք, որ «Հաղթանակ» զբոսայգու հարակից ժայռաբեկորների ծառազուրկ բարձունքին նախագծվում է կառուցել «Նոյյան Տապան» համալիրը, որի չափերը կհամապատասխանեն Տապանի բնական չափերին՝ 132 մ երկարություն, 22 մ լայնություն, 13 մ բարձրություն: Նախաձեռնող խմբի անդամների կարծիքով՝ անհրաժեշտ է նախագիծը դնել հանրային քննարկման, որպեսզի հետագայում հանրության շրջանում դժգոհություններ չառաջանան:
