Վիրջինիա նահանգի Սփրինգֆիլդ քաղաքում ապրող կատուն հավակնում է դառնալ ԱՄՆ Սենատի անդամ, հաղորդում է Fox News-ը:
Հենք անունով կատուն անկախ թեկնածու է, նրա անունը ներառված չէ ընտրական քվեաթերթիկներում:
Հենքի տերը և նրա ընտրարշավի մենեջերը՝ Մեթյու Օ’Լիրին պատմել են, որ սենատորի պաշտոնում կատվի հիմնական խնդիրներից մեկը կլինի աշխատատեղերի ստեղծումը: Նախկին անօթևան կատվի նախընտրական ծրագրում ասվում է, որ աշխատատեղերի ստեղծումը կօգնի բարելավել կյանքը քաղաքներում, հետո՝ շրջաններում, հետո՝ ամբողջ երկրում: Հենքը խոստանում է ընտրվելու դեպքում ապահովել, որ «կաթ կլինի յուրաքանչյուրի ափսեում»:
Տասնամյա Հենքի «հակառակորդները» փորձառու քաղաքական գործիչներ են՝ հանրապետական Ջորջ Ալենը և դեմոկրատ Թիմ Քեյնը: Կատվի նախընտրական ծրագրի հետ կարելի է ծանոթանալ նրա պաշտոնական կայքում, Facebook-ի և Twitter-ի նրա էջերում: Կատուն պատրաստվում է Սենատում զբաղեցնել Վիրջինիայի գործող ներկայացուցիչ Ջեյմս Ուեբի տեղը, որը ընտրություններին չի մասնակցի:
