Իրանական IRNA լրատվական գործակալության փոխանցմամբ՝ Իրանի արտգործնախարար Ալի Աքբար Սալեհին ելույթ է ունեցել ՄԱԿ-ի Մարդու իրավունքների հարցերով խորհրդի 19-րդ նիստում, որում դատապարտել է Աֆղանստանի «Բահրամ» ռազմաբազայում գտնվող ամերիկացի զինծառայողների կողմից Ղուրանը այրելը և նույն անելու կոչով դիմել է ՄԱԿ-ի Մարդու իրավունքների հարցերով խորհրդին.
«Սուրբ Ղուրանի այրումն անբարոյական է, նվաստացնում է մարդկային արժանիքները և վիրավորում է կրոնական արժեքները: Միևնույն ժամանակ, Իրանում մարդու իրավունքների շուրջ տիրող իրավիճակն ամենաբավարարներից մեկն է ժամանակակից աշխարհում»:
Սալեհին Իրանի ժողովրդի անունից շնորհավորել է մերձավորարևելյան տարածաշրջանի ժողովուրդներին հանուն անկախության մղած պայքարի համար՝ ընդգծելով, որ նրանք պետք է իրականացնեն խաղաղ գոյակցության քաղաքականություն և տուրք չտան արտաքին ուժերի սադրանքներին, որոնք ուղղված են ազգամիջյան ու միջկրոնական կրքեր բորբոքելուն:
Հիշեցնենք, որ Աֆղանստանում ամերիկացի զինծառայողների կողմից Ղուրանի այրումից հետո ԱՄՆ նախագահ Բարաք Օբաման ներողություն խնդրեց դրա համար: Սակայն Իրանում կոչեր հնչեցին, որ Ղուրանի այրման համար պետք է վառել Սպիտակ տունը, քանի որ միայն դա կարող է ապաքինել իրենց վերքերը:
