Հայ ազգային կոնգրեսին մաս կազմող «Հանրապետություն» կուսակցության նախագահ Արամ Սարգսյանը, պատասխանելով «Առաջին լրատվական»-ի հարցին, թե հնարավո՞ր է, որ տեղի ունենան արտահերթ ընտրություններ, ասաց. «Անձամբ ես և «Հանրապետություն» կուսակցությունն ամեն ինչ անում ենք, որ մեր երկրում փոփոխությունները լինեն հնարավորինս շուտ: Փոփոխությունները կարող են լուծել բազմաթիվ խնդիրներ` սկսած Լեռնային Ղարաբաղի հարցից, վերջացրած ներքաղաքական և սոցիալ-տնտեսական խնդիրներով: Դրա համար էլ մենք պայքարում ենք, որ տեղի ունենան արտահերթ ընտրություններ»: Իսկ արդյոք ՀԱԿ-ը կարողանո՞ւմ է օգտագործել իր ներուժը: Արամ Սարգսյանը կարծում է, որ Հայ ազգային կոնգրեսը մինչ օրս իր գործունեությունը ծավալել է ծրագրավորված, և դրա արդյունքները տեսանելի են: «Հայ ազգային կոնգրեսը կայացած կառույց է, և դա փաստ է»,- ասաց մեր զրուցակիցը: «Առաջին լրատվականը» Արամ Սարգսյանից հետաքրքրվեց, թե արդյոք հայ-թուրքական հարաբերությունները և արտաքին քաղաքական իրողությունները չե՞ն երկարաձգի իշխանությունների գործունեությունը: Մեր զրուցակիցը կարծիք հայտնեց, որ իշխանությունները հայ-թուրքական հարաբերությունների կարգավորման հեռանկարների վերաբերյալ քանիցս հանդես են եկել հակասական հայտարարություններով և վատթարացրել են երկու ժողովուրդների հարաբերությունները: «Մեկ նրանք հայտարարեցին, որ «թուրքը մնում է թուրք», հետո հանդես եկան «ֆուտբոլային դիվանագիտության» նախաձեռնությամբ, ինչն էլ չնպաստեց երկու ժողովուրդների հաշտեցմանը, այլ ավելի վատթարացրեց այդ հարաբերությունները»,- ասաց Արամ Սարգսյանը: Ընդդիմադիր գործիչը կարծիք հայտնեց, որ հայ-թուրքական հարաբերությունները չեն կարող իշխանության պահպանման համար ծառայել որպես լրացուցիչ ռեսուրս: