Грузия Online-ի փոխանցմամբ՝ Իսրայել այցելած Վրաստանի արտգործնախարար Գրիգոլ Վաշաձեն Թել Ավիվում հանդիպում է ունեցել նախագահ Շիմոն Պերեսի հետ: Հանդիպման ժամանակ կողմերը քննարկել են տարածաշրջանային անվտանգությանն առնչվող հարցեր:
Հանդիպումից հետո Վաշաձեն լրագրողների հետ զրույցում հայտարարել է, որ Իսրայելի նախագահին ամենաշատը հետաքրքրել են հենց այդ հարցերը. «Տարածաշրջանի ավտանգության հարցերը դարձան մեր բանակցությունների հիմնական քննարկման առարկաներից մեկը, քանի որ Պերեսը մանրամասն հետաքրքրվել է տարածաշրջանում առկա իրավիճակով:
Բացի այդ, մենք քննարկեցինք երկկողմանի հետաքրքրության կենտրոնում գտնվող հարցեր, մենք ընդգծեցինք երկու երկրների միջև առկա տնտեսական հարաբերությունների լավ մակարդակը և դրանք, ինչպես նաև քաղաքական կապերն է՛լ ավելի խորացնելու մեր ձգտումը»:
Հիշեցնենք, որ Վաշաձեն Իսրայելում հանդիպելու է նաև Կնեսետի նախագահ Ռեուվեն Ռիվլինի և իր իսրայելցի գործընկեր Ավիգդոր Լիբերմանի հետ: Վաշաձեի իսրայելական այցն ավարտվում է այսօր:
