«Առաջին ալիք»–ի Время-ի երեկոյան թողարկման ժամանակ Վլադիմիր Պուտինի դեմ չհաջողված մահափորձի խոստացված մանրամասներին սպասելով՝ ԶԼՄ-ները տեղեկություն են հավաքում Օդեսայում ձերբակալված Ադամ Օսմաևի մասին։ Վերջինս խոստովանել է, որ ծրագրվել էր ահաբեկչություն։
Լրագրողները պարզել են, որ 31-ամյա չեչեն, ՌԴ քաղաքացի Օսմաևը ներառված է ПолитЗеки.ру կայքի քաղաքական բանտարկյալների ցուցակում: Կայքում հաղորդվում է, որ նույնիսկ փաստաբաններին հայտնի չեն «մոսկովյան չեչենի» մեղավորության ապացույցները, ով բուհն ավարտել է Մեծ Բրիտանիայում և աշխատել խոշոր առևտրական ընկերություններից մեկում` որպես մենեջեր:
Օսմաևը 2007 թվականին գտնվում էր դաշնային հետախուզության մեջ` Մոսկվայում Հաղթանակի օրն ահաբեկչություն կազմակերպելու կասկածանքով։ Այն ժամանակ Մոսկվայի փողոցներից մեկում հայտնաբերվել էր ականապատ ավտոմեքենա, ինչը կարողացել էին վնասազերծել:
Ինչպես գրում է Коммерсант Online-ն, անցած տարի Օսմաևին հյուսիսկովկասյան գրոհայինների առաջնորդ Դոկ Ումարովի մարդիկ նոր ահաբեկչություն կազմակերպելու առաջարկ էին արել: Կեղծված փաստաթղթերով չեչենը ժամանել էր Ուկրաինա, որտեղ ԱՄԷ-ից նրան էր միացել Չեչնիայի բնիկ Ռուսլան Մադաևը և Ղազախստանից՝ Իլյա Պյանզինը: Նրանք սկսել էին պայթուցիկ սարքեր պատրաստել և օգտագործելու եղանակներն ուսումնասիրել:
Պյանզինն Ուկրաինայի անվտանգության ծառայությանը վկայություն է տվել, որ իրենք նախապատրաստել էին մահափորձ՝ Ռուսաստանի վարչապետ Վլադիմիր Պուտինի դեմ: Նրա խոսքերով՝ ահաբեկչությունը պետք է տեղի ունենար մարտի ընտրություններից անմիջապես հետո: Նախատեսվում էր օգտագործել մահապարտի դերը, որը պետք է իրականացներ Մադաևը, ով զոհվել էր հունվարին՝ ահաբեկչությանը պատրաստվելու նախավարժանքներից մեկի ժամանակ:
