Այս պահին Ախթալայի լեռնահարստացուցիչ կոմբինատում աշխատակիցները աշխատավարձերի վերաբերյալ դժգոհություններ չունեն: Այս մասին «Առաջին լրատվական»-ին տեղեկացրեց Ախթալայի լեռնահարստացուցիչ կոմբինատի արտաքին կապերի տնօրեն Գագիկ Շահնազարյանը`խոսելով կոմբինատի աշխատակիցների բողոքների մասին:
Նա նշեց, որ ի սկզբանե աշխատավարձերի վերաբերյալ խնդիր չի եղել, այդ խոսակցություններն ընդհանրապես ավելորդ են: Ըստ Գ. Շահնազարյանի` չի եղել մի դեպք, որ լեռնահարստացման կոմբինատում աշխատավարձերն ուշանան: «Աշխատավարձերը ճիշտ ժամանակին վճարվել են: Ինչ վերաբերում է աշխատավարձերի չափին, ապա մեր մոտ միջին աշխատավարձը 122 հազար դրամ է, ուրիշ խնդիրներ չեն եղել: Հիմա իրավիճակը նորմալ է, մարդիկ աշխատում են, ոչ մի անգամ աշխատանքները չեն ընդհատվել»,- նշեց կոմբինատի արտաքին կապերի տնօրենը`հավելելով, որ աշխատակիցների կողմից մտահոգություններ են եղել, նրանց հետ այս պահին անհատական աշխատում են և փորձում են հարցերին լուծում տալ: Նա հավաստիացրեց, որ յուրաքանչյուր աշխատող իր աշխատավարձի չափը գիտի, իր աշխատանքային պայմանագրում բոլոր ընթացակարգերի, աշխատավարձի չափի մասին կա գրված:
Այն հարցին, թե աշխատակիցների կյանքը որքանո՞վ է անվտանգ, պատասխանեց, որ կոմբինատում աշխատանքի անվտանգությունը ապահովելու համար կա հատուկ ինժեներատեխնիկական անձնակազմ, այս կամ այն պարագայում այդ անձնակազմը վերահսկողություն է իրականացնում:
Հիշեցնենք, որ անցյալ շաբաթավերջին մամուլում տեղեկություններ տարածվեցին, որ Սերոբ Տեր-Պողոսյանին պատկանող Ախթալայի լեռնահարստացուցիչ կոմբինատի աշխատակիցները բողոքելում են իրենց աշխատավարձերից և աշխատանքային անապահով պայմաններից: Բողոքող աշխատակիցները խուսափում են լրատվամիջոցների հետ զրուցել`վախենալով կորցնել իրենց աշխատանքը:
