Գրիգոր Ամալյանը մտածմունքների մեջ է

Ժուռնալիստների «Ասպարեզ» ակումբի խորհրդի նախագահ Լևոն Բարսեղյանը դիմել է ՀՌԱՀ նախագահ Գրիգոր Ամալյանին պատասխանատվության ենթարկել Հ1-ին օրվա հաղորդումների ընդհանուր հաշվարկով ՀՀ «Հեռուստատեսության և ռադիոյի մասին» օրենքով սահմանված` գովազդային ծավալի առավելագույն 7 տոկոս չափը խախտելու համար: «Առաջին լրատվական»-ի հետ զրույցում Լևոն Բարսեղյանն ասաց, որ ՀՌԱՀ-ը օրենքով սահմանված է որպես գովազդային օրենսդրությունը վերահսկող մարմին և ի պաշտոնե պարտավոր է վերահսկել հեռուստառադիո ոլորտի գովազդի համապատասխանությունը ՀՀ օրենքին: Բարսեղյանը նշեց, որ օրենքով սահմանված կարգով ՀՌԱՀ-ը պետք է ուսումնասիրի իրենց դիմումը, տեսնի՝ կա՞ արդյոք օրենքի խախտում և, օրենքով սահմանված կարգով, 15-30 օրվա ընթացքում պատասխանի դիմումին:
«Ես ինքս վերջին ութ տարում մի քանի անգամ բանավոր և գրավոր քննադատել եմ Հ1-ի գովազդային և ծրագրային քաղաքականությունը: Դրանց բանավոր ինչ-որ պատասխաններ են տրվել, փաստեր և հիմքեր են պահանջել: Այժմ մենք ունենք այդ փաստերը, ողջ տեսագրությունը կա, և եթե այժմ ՀՌԱՀ-ը ձեռնամուխ չի լինի սահմանված կարգով իրականացնել իր առաքելությունը, այսինքն՝ ՀՌԱՀ-ի անգործությունը, պաշտոնական դիրքի չարաշահումը, լիազորությունների անցումը Քրեական օրենսգրքի մեջ հստակ սահմանված հոդվածներ են, և դրանց համապատասխան ստպված կլինենք վիճարկել նաև ՀՌԱՀ-ի անգործությունը»:
Այդուամենայնիվ, Լևոն Բարսեղյանն ասաց, որ պետք չէ առաջ ընկնել, և իրենք սպասում են, թե ինչպիսի վարք կդրսևորի ՀՌԱՀ-ը. «Ենթադրում եմ, որ Ամալյան Գրիգորի գրասենյակը հիմա խոր մտածմունքների մեջ պիտի լինի: Սակայն այդ ամբողջն ապացուցելը 20 րոպեի գործ է։ Որ Հ1-ին էլ հարցնեն, նրանք էլ կասեն, որ խախտել են օրենքը: Ուղղակի հարց է՝ պատժամիջոցներ կիրառելո՞ւ է, կամ ի՞նչ պատժամիջոցներ է կիրառելու: Ամալյան Գրիգորն իր հանձնաժողովով վաղուց է վարկաբեկված»: