Գալիք ընտրություններին Գյումրիում ՀՀԿ-ԲՀԿ առճակատում չի սպասվում: Այս մասին «Առաջին լրատվական»-ի հետ զրույցում տեղեկացրեց «Ասպարեզ» ակումբի նախագահ Լևոն Բարսեղյանը`անդրադառնալով Գյումրիում գալիք ընտրություններին:
Նա նշեց, որ այսօր Գյումրիում ՀՀԿ-ԲՀԿ հակամարտություն չի տեսնում: Ըստ նրա` երկու թևերից էլ կան թեկնածուներ, ովքեր պետք է մեծամասնականով առաջադրվեն և լուրջ հայտ են ներկայացրել: «ԲՀԿ-ից ներկայացված կլինի Սամվել Բալասանյանը՝ 35 ընտրատարածքում, 34-ում` Մարտուն Գրիգորյանը, և բացառված չէ, որ Ալբերտ Զաքարյանը լինի: ՀՀԿ-ից կլինի Աշոտ Աղաբաբյանը՝ 33-րդ ընտրատարածքում, Սուքիաս Ավետիսյանը մեծամասնականով կարող է լինել, կարող է չլինել: Ամենայն հավանականությամբ մեծամասնականով կառաջադրվի նաև Արման Սահակյանը, ով ՀՀԿ անդամ չէ, բայց լավ հարաբերություններ ունի ՀՀԿ հետ»,- նշեց Լ. Բարսեղյանը` հավելելով, որ մոտ ապագայում ՀՀԿ-ն և ԲՀԿ-ն համաձայնության կգան, և լուրջ առճակատումներ չեն լինի:
Լ. Բարսեղյանը, սակայն, չի բացառում հակամարտություններ մի քանի ընտրատարածքներում: Հաշվի առնելով նաև Շարմազանովի որոշ մեկնաբանությունները` կարծում է, որ ՀՀԿ-ն և ԲՀԿ-ն իրար մեջ կկիսեն մեծամասնական տեղերը:
Անդրադառնալով ՀՀԿ-ԲՀԿ հակամարտությանը` «Ասպարեզ» ակումբի նախագահն այն իրական չհամարեց՝ համոզմունք հայտնելով, որ դա արհեստական կազմակերպված հակամարտություն է:
