Այս կիրակին Մեծ պահքի երկրորդ կիրակին է, որն անվանվում է Արտաքսման: Այն խորհրդանշում է Ադամի և Եվայի դրախտից արտաքսվելը, քանի որ նրանք հնազանդ չմնացին Աստծուն և կերան արգելված պտուղը: Ըստ Սուրբ Գրքի` Աստված ոչ միայն արտաքսեց նրանց դրախտից, այլ նաև պատժեց` ասելով. «Այսուհետ մարդն իր քրտինքով պետք է վաստակի օրվա հացը, և կինը պետք է ցավով ու տառապանքով զավակ ունենա… հող էիր, հող դարձիր»:
Արտաքսումն է պատճառը, որ Մեծ պահքի շրջանում եկեղեցիների վարագույրները փակ են և Սբ. Հաղորդությունից հավատացյալները չեն օգտվում:
Ազգագրագետ Սամվել Մկրտչյանը «Առաջին լրատվական»-ի հետ զրույցում նշեց, որ հնում մարդիկ ժամերգության ավարտից հետո վերադառնում էին տուն ու վայելում նախօրոք պատրաստված կերակուրները` մախոխը կամ պոչով ապուրը, ավելուկն ու բողկը. «Երեխաները ճիպոտներով այնքան էին հարվածում «Ակլատիզ» կոչվող խորհրդանշական տիկնիկին, մինչև դրա փետուրներից մեկն ընկներ: Դա նշանակում էր, որ վերջացավ պահքի ևս մեկ շաբաթ»:
