Հայաստանում զենքի շուկան բաժանվում է երկու մասի` օրինական և «սև»: Օրինական զենք կարելի է ձեռք բերել միայն որսորդական խանութներից: Այստեղ բավարար է միայն վճարել գումարը, և խանութն ինքը ապահովում է անհրաժեշտ բոլոր թղթերը` Որսորդմիության անդամության տոմս և հոգեկան հավասարակշռության վերաբերյալ բժշկից տեղեկանք: Օրինական կարճափող, կիսաավտոմատ հրացանն արժե 400,000 դրամ: Որսորդական խանութներում,սակայն, չեն վաճառվում ատրճանակներ, իսկ վաճառվող զենքերը` հրացանները և ավտոմատները ռազմական չեն. նախատեսված չեն պատերազմական գործողությունների համար, այլ միայն դրանց` տեխնիկապես փոքր-ինչ այլ՝ որսորդական տարբերակներն են: Զուտ ռազմական զենք ու զինամթերք վաճառվում է հայաստանյան սև շուկայում: Այստեղ վաճառվում են հիմնականում արցախյան պատերազմից մնացած ռազմամթերքը: Մեր զրուցակիցը, ով հասկանալի պատճառներով ցանկացավ անանուն մնալ, պնդում է, որ Հայաստան զենք է մտնում երկու ճանապարհով` Ղարաբաղից և Ախալքալակից: Հայաստանում հիմնականում ռուսական զինամթերք է վաճառվում: Սակայն Հայաստանում չկան զենքի «բարոններ». հիմնականում զենք են վաճառում մարդիկ, ովքեր ղարաբաղյան պատերազմից պահած-«թաղած» զենքեր ունեն: Մեր երկրում ամենաշատը օգտագործվող զենքերն են TT ու Մակարով ատրճանակները և Կալաշնիկով ավտոմատները: Սրանք «հասարակ մահկանացուների» համար են, քանի որ եվրոպական, ամերիկյան զինատեսակները բավական թանկ են, փամփուշտն էլ դժվար է հայթայթել: Զենք ունեցողներն իրենց ապրանքը վաճառում են բավականին թանկ գնով, եթե զենքի խիստ կարիք ունեցող գնորդ է հայտնվում: Սովորաբար TT ատրճանակն արժե մինչև 1000 դոլար, Մակարովը` 600 դոլար: Կալաշնիկով ավտոմատի տարբեր տեսակներն ունեն տարբեր գներ. АК74-ի և АК47 –ի գինը մոտ 1500 դոլար է, իսկ АКСУ-ինը` 800-1000 դոլար: Վաճառվում են նաև տեղական արտադրության ինքնաշեն զենքեր: Դրանց մեծ մասը հայ մետաղագործները ստեղծել են պատերազմի տարիներին: Սրանց առավելությունն այն է, որ նախ համեմատաբար էժան են` սկսած 200 դոլարից, երկրորդ` «մաքուր» անցյալ ունեն, այսինքն` քիչ հավանական է, որ հետո պարզվի, թե այդ զենքով հանցագործություն է կատարվել: Պետք է նշել, որ զենքի հայկական շուկայում մեծ տարածում ունեն նաև նռնակները` ևս ռուսական արտադրության: Հիմնականում վաճառվում են Ф1 և РГД մակնիշի նռնակներ: Սրանց գինը տատանվում է 200-600 դոլարի սահմաններում: