«Ես խուճապի մեջ եմ: 21-րդ դարում, այն էլ՝ թոքաբորբից մենք պետք է կորուստ չունենայինք բանակում, և ոչ թե դեպքերն են շատ, այլ մի դեպքն էլ աթույլատրելի է»,- «Առաջին լրատվական»-ի հետ զրույցում հայտարարեց «Զինվոր» ՀԿ համակարգող խորհրդի նախագահ Մարգարիտա Խաչատրյանը՝ մեկնաբանելով բանակում հաճախակիացած թոքաբորբով հիվանդացության և օրեր առաջ նույն թոքաբորբի պատճառով զինծառայող Նարեկ Մարտիրոսյանի մահվան դեպքերը:
Մ. Խաչատրյանի կարծիքով՝ խնդիրը դեղորայքի մեջ է, եթե զինծառայողը բուժում ստանում է և այն չի օգնում: Նրա խոսքով՝ ցանկացած պահի վիրուսն իր ազդեցությունը թողնում է, առավել ևս եթե կլիմայական փոփոխություն է լինում: «Բայց թե Նարեկ Մարտիրոսյանի նման զինվորին մենք ոնց թոքաբորբով կորցրեցինք, ես բառեր չեմ գտնում: Եթե ասենք, որ շատ է թոքաբորբի քանակը, սննդի պակաս կա և այլն… անտիբիոտիկները չեն օգնում»,- ասաց Մ. Խաչատրյանը:
Նա տեղեկացրեց, որ պատրաստվում է հանդիպել պաշտպանության նախարարին ու ներկայացնել իր կասկածները՝ կարո՞ղ է դեղորայքի խնդիր կա, կամ որակն այն չի:
«Եթե ջրծաղիկ ու թոքաբորբով զինվոր պետք է կորցնեմ, ես չեմ պատկերացնում, թե մեր ճակատագիրն ինչով է վերջանալու: Եթե ջրծաղիկով հիվանդ զինծառայողի մահվան մեջ անտարբերությունը տեղ է ունեցել, ապա Նարեկի դեպքում անտարբերություն չի եղել: Դեղերը ստացել է, 4 օր եղել էր Ստեփանակերտի հոսպիտալում, հետո դրական դինամիկա ստանալուց հետո տեղափոխվել էր Երևան: Հակառակորդի պատճառով կորուստ ունենում ենք, բայց գոնե հիվանդությունների մասով չունենանք»,- նշեց Մ. Խաչատրյանը:
