2012 թ. փետրվարի 7-ին ՀՀ կենտրոնական բանկի խորհրդի որոշումներով փոփոխություններ են կատարվել մի շարք կանոնակարգերում` որակավորման քննություններին թեկնածուների հերթագրման ընթացակարգի վերաբերյալ: Այսուհետ ՀՀ կենտրոնական բանկում իրականացվող բոլոր տեսակի որակավորման քննություններին հերթագրումն իրականացվելու է միայն Կենտրոնական բանկի լիցենզավորման ենթակայքէջի` file.cba.am-ի միջոցով, բացառելով հեռախոսով, էլեկտրոնային փոստով կամ գրավոր ձևով ուղարկված դիմումով որակավորման քննություններին հերթագրվելը:
Այս ընթացակարգի նպատակը որակավորման քննություններին թեկնածուների հերթագրման կարգի պարզեցումն է և այն ավելի արդյունավետ դարձնելը: Մասնավորապես` ինտերնետի միջոցով հերթագրման տարբերակի առավելություններից մեկն այն է, որ թեկնածուները որակավորման քննություններին կարող են հերթագրվել շաբաթվա ցանկացած օր և ցանկացած ժամի: Դիմողներին հասանելի է քննությունների անցկացման օրերի մասին տեղեկատվությունը, որին տիրապետելով նրանք ինքնուրույն կարող են ընտրել քննության համար հարմար օրը:
Նախատեսվում է, որ վերոհիշյալ փոփոխություններն ուժի մեջ կմտնեն 2012 թ. ապրիլի 1-ից: Դրանք սահուն ներդնելու նպատակով Կենտրոնական բանկի մասնագետները ապրիլի 1-ից սկսած՝ 3 ամսվա ընթացքում կօժանդակեն դիմողներին: Լրացուցիչ տեղեկություններ ստանալու համար դիմողները կարող են զանգահարել (010)-59-25-59 հեռախոսահամարով:
ԿԲ հասարակայնության հետ կապերի ծառայությունից «Առաջին լրատվական»-ին հայտնեցին, որ այդ ժամկետը լրանալուց հետո` հուլիսի 1-ից, բոլոր թեկնածուները որակավորման քննություններին ինքնուրույն են հերթագրվելու` file.cba.am-ում տվյալներ մուտքագրելով:
