«Առաջին լրատվականի» աղբյուրների հավաստմամբ, Իջևանի գնդի հրամանատար Սերգեյ Կարապետյանի նկատմամբ հարուցվել է քրեական գործ: Ռազմական ոստիկանությունը դեպքից անմիջապես հետո սկսել էր նյութեր հավաքել, սակայն անհայտ էր, թե արդյոք քրեական գործ կհարուցվի բարձրաստիճան զինվորականի նկատմամբ: Այսօր հայտնի դարձավ, որ ոչ միայն քրեական գործ է հարուցվել` խուլիգանության հատկանիշներով` Քրեական օրենսգրքի 258 հոդվածի երրորդ մասով, այլև ՊՆ ղեկավարությունը որոշել է, որ Սերգեյ Կարապետյանը պետք է աստիճանազրկվի և հեռացվի համակարգից:
Հիշեցնենք, որ Իջևանի զորամասերից մեկի անցագրային կետի մոտ դեկտեմբերի 31-ին` ժամը 23:00-ի սահմաններում, տեղի էր ունեցել միջադեպ զորամասի հրամանատար Սերգեյ Կարապետյանի և մի քանի երիտասարդների միջև: Պաշտպանության նախարարությունը դեպքի հանգամանքների վերաբերյալ այլ տեղեկություններ պաշտոնապես չի հաղորդում:
Ոչ պաշտոնական տեղեկություններով, վիճաբանությունը տեղի է ունեցել այն բանից հետո, երբ Տավուշի մարզի Գետահովիտ գյուղի մի քանի երիտասարդ բնակիչներ գնացել են զորամաս` իրենց ծանոթներից մեկին տեսնելու: Անցագրային մուտքի մոտ զորամասի հրամանատարը նկատել է նրանց և հայհոյանքներով ու սպառնալիքներով պահանջել լքել այդ տարածքը, երիտասարդները պատասխանել են և ծագել է վիճաբանություն։Սերգեյ Կարապետյանը թույլ չի տվել երիտասարդներին հեռանալ, տարել է իր առանձնասենյակ և ավտոմատից սկսել է կրակել պատերին: Երիտասարդները թռել են պատշգամբից, մեկի ոտքն է ջարդվել, մյուսի` կողը: Ամենածանրը 20–ամյա Տարոն Ենգիբարյանի վիճակն է, ով տեղափոխվել է հիվանդանոց և արդեն մեկ շաբաթ անգիտակից վիճակում գտնվում է Երևանի «Գրիգոր Լուսավորիչ» բժշկական կենտրոնի վերակենդանացման բաժանմունքում՝ ծանր գանգուղեղային վնասվածքով։