«Կոնգրես» հյուրանոցում այսօր Քաղաքական և միջազգային հետազոտությունների հայկական կենտրոնը կազմակերպել էր քննարկում` «Ինչ սկզբունքներով են ձևավորվում նախընտրական ցուցակները» թեմայի շրջանակներում։ Քննարկմանը մասնակցում էին տարբեր քաղաքական ուժերի ներկայացուցիչներ:
«Առաջին լրատվական»-ի հարցին՝ ինչպե՞ս կարելի է հասկանալ «Հանրապետություն» կուսակցության երեկվա հայտարարությունը, թե միայն կուսակցության առաջնորդն է ներգրավվելու համամասնական ցուցակում, ՀԱԿ ներկայացուցիչ Սամվել Աբրահամյանը նկատեց, որ այդ հայտարարությունը պետք է հասկանալ այնպես, ինչպես այն կա. «Պարզ գրված է՝ կուսակցությունը մնում է ՀԱԿ-ի կազմում և պատրաստ է լծվել ընդհանուր գործին: Մեր ընկերները իրենց որոշումն են կայացրել: «Հանրապետություն» կուսակցությունը ընտրել է այս ճանապարհը»:
Իսկ ինչպե՞ս է ՀԱԿ-ը պատկերացնում ԱԺ-ում Սերժ Սարգսյանի հրաժարականի մեխանիզմը, և ո՞րն է այն նշաձողը, որից ցածր ձայներ ստանալու դեպքում ՀԱԿ-ը կարող է վայր դնել մանդատները, Սամվել Աբրահամյանը պատասխանեց.
«Ս.Սարգսյանի հրաժարականին Կոնգրեսը կարող է հասնել, եթե ԱԺ-ում ունենա մեծամասնություն և պարտադրի իմպիչմենտ, հաջորդը` կարելի է մյուս ուժերի հետ հասնել այդ իմպիչմենտին, և երրորդ տարբերակը՝ երբ մինչև ընտրություններն է հասնում հրաժարականին: Եթե մինչև ընտրությունները չավարտվի գործընթացը, ապա այն կշարունակվի ԱԺ»-ում»,- նշեց ՀԱԿ ներկայացուցիչը:
«Առաջին լրատվական»-ը
Անուշ Սեդրակյանին խնդրեց անդրադառնալ սոցիոլոգ Գևորգ Պողոսյանի հայտարարությանը, թե՝ «Ազատ դեմոկրատներ»-ը իրենց ուսումնասիրություններում չեն երևում, և եթե իշխանությունները ցանկանան նկատել այդ կուսակցությունը, ապա ինչ-որ բան կարող են ձեռնարկել, որպեսզի այն հայտնվի խորհրդարանում:
«Այդ ելույթները ասվում են, որպեսզի որոշակի պատկերացումներ մոդելավորվեն հասարակության գիտակցության մեջ: Բայց ես կարող եմ ասել, որ վերջերս Е-journal-ը հարցումներ է իրականացրել, որտեղ «Ազատ դեմոկրատներ»-ը առաջին հորիզոնականն էր զբաղեցնում»:
«Առաջին լրատվական»-ը դիմեց նաև ԲՀԿ ներկայացուցչին՝ ինչպե՞ս է ԲՀԿ-ն վերաբերվում այն համոզմունքին, որ Վարդան Օսկանյանի` ԲՀԿ ընդգրկվելով՝ ավելի համոզիչ դարձավ այն փաստը, որ ԲՀԿ-ն Ռոբերտ Քոչարյանի կուսակցությունն է և ղեկավարվելու է նրա կողմից, Վահե Էնֆիաջյանը պատասխանեց.
«Հայաստանի երկրորդ նախագահը՝ Ռոբերտ Քոչարյանը, որևէ կապ չունի ԲՀԿ-ի հետ, հետևաբար որոշումների կայացման վրա չի կարող ազդել: Իսկ Վարդան Օսկանյանը եկել է մեր կուսակցություն, որպեսզի իր քաղաքական պոտենցիալը իրացնի այս քաղաքական ուժի միջոցով»:
