Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում քիչ առաջ ավարտվեց ՀՀ ճանապարհային ոստիկանության նախկին պետ Մարգար Օհանյանի և մյուսների դատաքննությունը: Մինչ այդ դատարանում մեղադրողը հրապարակեց գործում առկա գրավոր ապացույցները:
«Առաջին լրատվական»-ի հարցին՝ որո՞նք էին այն ապացույցները, որոնք բացառում էին Մարգար Օհանյանին առաջադրված մեղադրանքը, վերջինիս պաշտպան Մկրտիչ Վասակյանը պատասխանեց. «Բոլոր ապացույցներն էլ բացառում էին, քանի որ իրեղեն ապացույցներ չկան, բանավոր 3 ցուցմունքներ էին: Ավելի շատ Մարգար Օհանյանի օգտին են բոլոր ակտերը, կազմման-ընդունման հաշվետվությունները։ Բոլորն օրինական կարգով կատարվել են. որքան բենզին ստացվել է, այդքան էլ բաց է թողնվել:
Այսինքն՝ չկա մի ակտ, գրություն, որ Մարգար Օհանյանը ոստիկանությանը քիչ բենզին է տրամադրել: Ընդամենը 3 ցուցմունք կա։ Իրականում ինքը բենզին չի ստացել, եղել են կտրոններ, որոնց վերաբերյալ «Միկա» ՍՊ ընկերությունն էլ է գրություն ուղարկել, որ վաթսուն քանի տոկոսը ոստիկանությունն է ստացել, 30 քանի տոկոսը` այլ մեքենաներ, բայց այդ մեքենաներից ոչ մեկը Մարգար Օհանյանինը, նրա ազգականներինը չի եղել»:
Ի դեպ, ըստ մեղադրողի հրապարակած ապացույցների` նշյալ այլ մեքենաների մեջ հիշատակվում էր ամբաստանյալներից Ստեփան Կարախանյանի ազգականների անունը:
Դրանից հետո դատաքննությունը հայտարարվեց ավարտված, և դատարանն արդեն մարտի 1-ին նշանակված նիստին կանցնի դատական վիճաբանությունների փուլին: