Ազգային վիճակագրական ծառայության տվյալների համաձայն`ՀՀ-ում 2007-ին ցանվել է 99.3 հազար հեկտար ցորեն, 2008-ին`93.1 հազար հեկտար, 2009-ին`91.9 հազար հեկտար, 2010-ին`87.6 հազար հեկտար, 2011-ին`77.8 հազար հեկտար: Այսինքն՝ 2007-ի համեմատ 2011-ին ցորենի ցանքատարածությունները կրճատվել են 27.6%-ով, իսկ 2010-ի համեմատ`12.6%-ով: Սակայն ինչպես «Առաջին լրատվական»-ի հետ զրույցում պարզաբանեց ՀՀ գյուղատնտեսության փոխնախարար Սամվել Գալստյանը, իրականում անցած տարի ցորենի ցանքատարածություններն ավելացել են 18.5 հազար հեկտարով, պարզապես այդ ցուցանիշը ԱՎԾ-ն դեռ չի հաշվառել, քանի որ աշնանացանի տվյալներն ամբողջացվում են հաջորդ տարի հունիսին:
Ս. Գալստյանի խոսքով՝ 2011-ի դեկտեմբերի 30-ի դրությամբ ՀՀ-ում կատարվել է 94 հազար 609 հեկտար աշնանացանի ցանք՝ 2010 թ. 76 հազար 13 հեկտարի փոխարեն, հավելումը՝ 24.5%: «Առաջին անգամ աշնանացանը գերազանցեց նախկին տարիների մակարդակը: Մեր նպատակն է սերմնաբուծության ծրագրով ցանքատարածությունները հասցնել 124-125 հազար հեկտարի, համախառն բերքը՝ 375-380 հազար տոննայի»,- ասաց փոխնախարարը:
2010-2014 թթ. սերմնաբուծության ծրագիրն ավարտվում է 2014-ին, արդյունքները կերևան 2015-ին: Ս. Գալստյանի հաշվարկով՝ ծրագիրը սկսվել է համախառն բերքը 170 հազար տոննայից, պետք է ավելացվի մոտ 200 հազար տոննայով: ՀՀ-ում ազգային հաշվեկշռով տարեկան օգտագործվում է օրական գրեթե 1000 տոննա ցորեն: Երբ մեր բնակչության 3.2 մլն էր հաշվվում, 900 տ-ով օրական հաշվելիս, ապա 365 հազար տոննա միայն պարենի համար օգտագործվող ցորենն էր կազմում, բայց քանի որ բնակչությունը պակասել է, դրա համար մեր պարենային ցորենը 325-330 հազար տոննա է: Նախարարի խոսքով՝ եթե նախկինում անհրաժեշտ պաշարի 33%-ն էինք ապահովում, ապա ծրագրի իրագործումից հետո ցորենի արտադրությունը կբավարարի ներքին պահանջարկի 48%-ին:
Միաժամանակ նա նշեց, որ եղած 448.5 հազար հեկտար վարելահողերից տարեկան օգտագործվում է 285 հազար հեկտարը: Այդ ցուցանիշը պետք է հասցվի մինչև 400 հազար հեկտարի: «Դրա համար սուբսիդիա, ծրագրեր, վառելիք և այլն պետք է տանք: Հակառակ դեպքում բնակչությունը հող չի մշակի»,- նշեց փոխնախարարը:
