Ռուսական Regnum լրատվական գործակալության փոխանցմամբ՝ Աբխազիայի նախագահ Ալեքսանդր Անկվաբը, որի դեմ երեկ առավոտյան իրականացվել է մահափորձ, Սուխումում տեղի ունեցած Աբխազիայի անվտանգության արտահերթ խորհրդում հայտարարել է, որ գործի հետաքննման համար Աբխազիա են ժամանելու Ռուսաստանի Անվտանգության դաշնային ծառայության աշխատակիցները:
Անկվաբն Անվտանգության խորհրդի անդամներին հայտարարել է. «Մեր ռուս գործընկերները առաջարկել են իրենց օգնությունը, և մենք չենք հրաժարվել դրանից: Ես ամենաշատը մտածում եմ այն տղաների մասին, որոնք քաջաբար պայքարում էին հանցագործների դեմ: Դժբախտաբար, նրանցից մեկը զոհվեց, իսկ մյուսը գտնվում է ծանր վիճակում: Հանցագործների նպատակը Աբխազիայի ապակայունացումն է: Մեզանից ակնկալում են վճռական գործողություններ ահաբեկչության, բանդիտիզմի, քրեական հանցագործության դեմ պայքարում»:
