Բրիտանական The Guardian թերթի լրագրող Լյուկ Հարդինգը երեկ ելույթ է ունեցել ԱՄՆ կոնգրեսի Հելսինկյան հանձանժողովում և պատմել Մոսկվայում իր աշխատելու տարիների մանրամասնությունների և այն մասին, թե ինչպես ինքը 2011թ. Ռուսաստանում դարձավ անցանկալի անձ:
Ինչպես հաղորդում է «Ամերիկայի ձայն»-ը, Հարդինգը պատմել է, որ Անվտանգության դաշնային ծառայությունն իր շուրջ այնպիսի մթնոլորտ է ստեղծել, որ ինքը սկսել է վախենալ սեփական անձից և իր մերձավորներից: «Օտարերկրյա լրագրողները Ռուսաստանում աշխատում են այնպիսի պայմաններում, երբ նրանք ամեն օր ստիպված են ընտրություն կատարել այցագրի, հետևաբար և աշխատանքից զրկվելու, և իրենց ռեպորտաժներում իշխանությունների համար անցանկալի թեմաներ շոշափելու միջև»,- պատմել է Հարդինգը:
Նրա կարծիքով՝ Ռուասատանում աշխատող օտարերկրյա լրագրողների շրջանում հոգեբանական ճնշումը հաճախ դառնում է ինքնագրաքննման պատճառ:
Հարդինգը սեփական փորձից օրինակներ է բերել, թե որ թեմաներն են անցանկալի Ռուսաստանի իշխանությունների համար: Առաջինը, նրա կարծիքով, կոռուպցիան է, ընդ որում ոչ թե «աբստրակտ կոռուպցիան, որի մասին կարելի է և՛ ազատ խոսել, և՛ գրել», այլ կոնկրետ՝ անուններով և փաստերով:
ԱՄՆ-ում Ռուսաստանի դեսպանության երկրորդ քարտուղար Սերգեյ Կուզնեցովը կասկած է հայտնել, որ Ռուսաստանի վերին էշելոններում կոռումպացվածության վերաբերյա կոնկրետ ապացույցներ կան: Կուզնեցուվը խնդրել է լրագրողին թվել դրանք, իսկ Լյուկը, ի պատասխան, մատնանշել է իր կողմից անցկացված հետաքննությունը ժամանակակից Ռուաստանին նվիրված «Մաֆիական պետություն» (Mafia State) գրքում:
Երկրորդ արգելված թեման Ռամզան Կադրիովն է, որը, Հարդինգի խոսքերով, «Հյուսիսային Կովկասում Պուտինի ամենամոտ դաշնակիցն է և վտանգավոր մարդ»: Յուրաքանչյուր ոք, ով փորձում է ճշմարտություն գրել Կադիրովի մասին, պետք է գիտակցի, թե դրանով ինչ ռիսկի է դիմում: Երրորդ թեման Ռուսաստանի գաղտնի ծառայությունների գործունեությունն է: Լրագրողական միջամտությունը այս բնագավառում խիստ սահմանափակ է և պատժելի:
Լրագրողի համոզմամբ՝ Ռուսաստանի քաղաքական համակարգը չի կարող փոխվել, քանի դեռ իշխանության գլուխ կանգնած է Վլադիմիր Պուտինը, իսկ որպես նախագահ վարչապետի վերադարձը Կրեմլ անխուսափելի է: Հարդինգը համոզված է, որ Վլադիմիր Պուտինը շատ է ցանկանում հնարավորինս երկար մնալ պետության ղեկավարի պաշտոնում՝ անկախ այն բանից՝ երկրի քաղաքանիներն ուզում են նրան այնտեղ տեսնել, թե՝ ոչ:
