Հայ ազգային կոնգրեսին մաս կազմող «Ժողովրդավարական հայրենիք» կուսակցության փոխնախագահ Ղուկաս Մեհրաբյանից «Առաջին լրատվականը» հետաքրքրվեց, թե որքանով են իրատեսական ընդդիմադիր գործիչների այն կանխատեսումները, որ իշխանական բուրգը փլուզվում է, և հնարավոր է լինեն արտահերթ ընտրություններ: «Իշխանությունների բոլոր քայլերն ուղղված են իշխանությունը պահելուն: Ոչ մի բարեփոխում նրանք չեն իրականացնում, իսկ նախարարներ փոխելը մանր հարցեր են, որոնք ժողովրդի աչքին թոզ են փչում: Դրանից ո’չ կոռուպցիան է վերանում, ո’չ էլ երկիրն է զարգանում: Երկիրը գլխիվայր գնում է դեպի անդունդ: Բոլորն էլ տեսնում են, որ այս համակարգը դատապարտված է կործանման, չունի բարեփոխումներ իրականացնելու որևէ ծրագիր»,- ասաց մեր զրուցակիցը: Հարցին, թե հնարավո՞ր է, որ տեղի ունենան արտահերթ ընտրություններ, Ղուկաս Մեհրաբյանը պատասխանեց. «Չի բացառվում»: Ընդդիմադիր գործչից հետաքրքրվեցինք`արդյո՞ք Հայ ազգային կոնգրեսը բավարար չափով օգտագործում է իր ներուժը` իշխանափոխության հասնելու համար: «ՀԱԿ-ը չի կարող այնպիսի քայլեր անել, որ հաճոյանա ժողովրդին: Իշխանության գալն ինքնանպատակ չէ, պետք է լուծել Հայաստանի ապագայի հարցը»,- ասաց «Ժողովրդավարական հայրենիք» կուսակցության փոխնախագահը: