Արման Կյուրեղյանը բանակ է զորակոչվել 2011թ. դեկտեմբերի 5-ին՝ ՊՆ Մարալիկի տարածքային զինկոմիսարիատի կողմից, և ծառայության նշանակվել ՀՀ զորամասերից մեկում` որպես շրջանավարտ կրտսեր մասնագետ, շարքային զինվորական կոչումով: Համատեղ ծառայության ընթացքում ճանաչել է ժամկետային զինծառայող, շարքային Խաչատուր Խաչատրյանին և նրա հետ գտնվել է նորմալ ծառայողական փոխհարաբերությունների մեջ: Ամբաստանյալ Արման Կյուրեղյանի պատմելով` 2011թ. մայիսի 25-ին, ժամը 15-ի սահմաններում, նույն զորամասի ենթասպա, պահեստապետ Մկրտիչ Հայրապետյանի հանձնարարությամբ ինքը և շարքային Խաչատուր Խաչատրյանը գնացել են զորամասի թիվ 1 պահեստ` ռազմամթերքի արկղերը վերադասավորելու: Սկսել են աշխատել:
Ընթացքում Խաչատուրն ասել է, որ թևը ցավում է, և չի ցանկացել աշխատել: Ինքը` Արմանը, առաջարկել է նրան այդ հարցով դիմել Հայրապետյանին կամ բուժկետ, սակայն Խաչատրյանը պատասխանել է, թե դա իր գործն է՝ ինքն է որոշում, թե երբ պետք է աշխատի, և իրեն ծաղրուծանակի ենթարկելով, սպառնալով ծեծի ենթարկել` ստիպել է միայնակ վերադասավորել ռազմամթերքի արկղերը: Այդ պատճառով իրենք սկսել են վիճաբանել, քաշքշել և փոխադարձ հարվածներ են հասցրել միմյանց: Ինքը մեկ անգամ՝ ձեռքով, 2-3 անգամ էլ ծնկով հարվածել է Խաչատրյանի որովայնին: Ընթացքում պահեստ է մտել ենթասպա Հայրապետյանը և տեսնելով նրանց միմյանց քաշքշելիս՝ մոտեցել և հարցրել է, թե ինչ է պատահել: Իրենք, տեսնելով Հայրապետյանին, անմիջապես դադարել են իրար քաշքշել, և ինքը վերջինիս պատմել է տեղի ունեցածի մասին: Հայրապետյանը իրեն և Խաչատրյանին նախատել է, որից հետո Խաչատրյանը գնացել և նստել է արկղերի վրա, իսկ ինքը դուրս է եկել պահեստից: Քիչ անց լսել է Խաչատրյանի ձայնը՝ «թող, ցավում է», որից հետո Խաչատրյանը Հայրապետյանի ուղեկցությամբ դուրս է եկել պահեստից և հեռացել:
Քիչ անց պահեստ է եկել շարքային Տիգրանը Հարությունյանը, և նրա հետ միասին կատարել են հանձնարարված աշխատանքը: Երեկոյան իմացել է, որ Խաչատուրին տեղափոխել են հոսպիտալ, իսկ հաջորդ օրն իմացել է, որ նրան վիրահատել են:
Դատարանում Արման Կյուրեղյանն ասել է, որ Խաչիկին ծանր վնաս պատճառելու դիտավորություն չի ունեցել և զղջում է կատարածի համար: Մինչդեռ նախաքննության ընթացքում սկզբում չի ընդունել մեղադրանքը և փորձել է ոտքով հարվածելը վերագրել զորամասի պահեստապետ Հայրապետյանին, հետո մասամբ է ընդունել մեղքը և չի բացառել, որ Խաչիկը իր հարվածներից կարող էր վնասվածք ստացած լինել: Ի վերջո դատարանում ընդունել է մեղքը:
Երկրորդ ամբաստանյալը` զորամասի պահեստապետ, պայմանագրային զինծառայող Մկրտիչ Հայրապետյանը, քրօրի 360 հոդվածի 2-րդ մասով (ստորադրյալի նկատմամբ բռնությունը) առաջադրված մեղադրանքում իրեն մեղավոր չի ճանաչել և պնդել է, որ պահեստում Խաչատրյանին չի հարվածել, չի ապտակել և որևէ կերպ նրան չի վիրավորել:
Տուժող Խաչատուր Խաչատրյանի դատաքննական ցուցմունքները շատ քիչ են տարբերվել ամբաստանյալ Կյուրեղյանի ցուցմունքներից. ըստ նրա` ոչ մի սպառնալիք, ծաղրուծանակ էլ չի եղել Կյուրեղյանի նկատմամբ, իսկ ենթասպա Հայրապետյանն էլ իրեն չի հարվածել, չի ապտակել, չի վիրավորել և իր պատիվն ու արժանապատվությունը չի ստորացրել:
Տուժող Խաչատուր Խաչատրյանը նաև հայտնել է, որ իր բուժման ընթացքում ծնողները կատարել են ծախսեր` բուժման, ճանապարհածախսի և սննդի, և ներկայացրել է քաղաքացիական հայց 300.000 դրամի չափով:
Համաձայն դատաբժշկական փորձաքննության եզրակացության` Խաչատուր Խաչատրյանի ստացած մարմնական վնասվածքները` որովայնի փակ բութ վնասվածքի, փայծաղի պատռվածքի, ներքին արյունահոսության, տարածուն արյունալի պերիտոնիտի, հեմոռագիկ երկրորդ աստիճանի շոկի ձևով, հասցվել է բութ առարկայի ներգործությամբ, հնարավոր է՝ որոշման մեջ նշված ժամկետում, որոնք առաջացրել են առողջությանը ծանր վնաս` կյանքին վտանգ սպառնացող:
Արագածոտնի մարզի ընդհանուր իրավասության դատարանը որպես Արման Կյուրեղյանի պատասխանատվությունը և պատիժը մեղմացնող հանգամանք հաշվի է առել այն, որ նա երիտասարդ է, նախկինում դատապարտված չի եղել, բնութագրվում է դրական, զղջում է կատարածի համար, հանցագործությունը պայմանավորվել է տուժողի վարքագծի հակաբարոյականությամբ, հատուցել է տուժողին պատճառված վնասը, և տուժողը խնդրեց մեղմ պատիժ սահմանել Կյուրեղյանի նկատմամբ, իսկ պատասխանատվությունը և պատիժը ծանրացնող հանգամանքները բացակայել են:
Դատարանում տուժող Խաչատուր Խաչատրյանը նաև հայտնել է, որ ամբաստանյալ Կյուրեղյանը լրիվ հատուցել է իրեն պատճառած վնասը, և դատարանը քաղհայցի հարցը համարել է լուծված:
Ի վերջո, Արման Կյուրեղյանը դատապարտվել է 4 տարվա ազատազրկման, իսկ
Մկրտիչ Հայրապետյանն արդարացվել է` կատարված հանցագործությանը նրա մասնակցությունն ապացուցված չլինելու պատճառաբանությամբ:
Այս դատավճռի դեմ վերաքննիչ բողոք է ներկայացրել մեղադրողը և պահանջել` ամբողջությամբ բեկանել Արագածոտնի մարզի առաջին ատյանի ընդհանուր իրավասության դատարանի դատավճիռը. Արման Կյուրեղյանի նկատմամբ սահմանված պատիժը խստացնել, Մկրտիչ Հայրապետյանի նկատմամբ կայացնել մեղադրական դատավճիռ` նշանակել նշված հոդվածի սանկցիայով նախատեսված ազատազրկման ձևով համաչափ պատիժ, նրա նկատմամբ խափանման միջոց ընտրել կալանավորումը և նրան կալանքի վերցնել դատարանի նիստերի դահլիճից: