News Georgia-ի փոխանցմամբ՝ Վրաստանի Լեյբորիստական կուսակցությունը պահանջել է Աֆղանստանից դուրս բերել վրացական զինվորական կոնտինգենտը: Այս մասին նշված է կուսակցության տարածած երեկվա հայտարարությունում:
Հայտարարությանը նախորդել էր Աֆղանստանում վրացի 3 զինծառայողների մասին բոթը, որոնք զոհվել էին թալիբների հարձակման ժամանակ: Դրանով իսկ Աֆղանստանում զոհված վրացի զինծառայողների թիվը հասավ 15-ի:
Լեյբորիստները մյուս ընդդիմադիր կուսակցություններին կոչ են անում համատեղ մշակել համազգային փաստաթուղթ՝ Աֆղանստանում գտնվող վրացի զինծառայողներին այնտեղից դուրս բերելու պահանջով: Ըստ լեյբորիստների՝ նրանք, ովքեր չեն ստորագրի այդ փաստաթուղթը, կհանդիսանան Վրաստանի թշնամիներ և Սաակաշվիլիից էլ վատը:
Լեյբորիստները կարծում են, որ ԱՄՆ-ը օկուպացիոն պատերազմ է վարում Աֆղանստանում, և վրացիներն այնտեղ անելիք չունեն: Նրանք ընդգծում են, որ Սաակաշվիլին Աֆղանստանում զոհաբերում է վրացի զինծառայողներին, որպեսզի դրանով իսկ ստանա ԱՄՆ-ի աջակցությունն իր համար:
Վրացի զինծառայողները Միջազգային անվտանգության աջակցության ուժերի (ISAF) կազմում խաղաղապահ առաքելությամբ Աֆղանստանում հանդես են գալիս 2009 թվականի օգոստոսի 6-ից: Այս տարի Աֆղանստանում վրաց զինծառայողների թիվը հասցվելու է 1600-ի, որով Վրաստանն Աֆղանստանում կունենա ՆԱՏՕ-ի անդամ չհանդիսացող երկրների թվում ամենամեծ զինվորական կոնտինգենտը:
Հիշեցնենք, որ նախորդ տարվա հունիսի կեսերին էլ վրաց լեյբորիստները կոչով դիմել էին վրացի զինծառայողների հարազատներին ու մերձավորներին, որպեսզի նրանք արգելեն իրենց զավակներին Աֆղանստան ուղարկել.
«Վաղուց Վրաստանը ԱՄՆ-ի և ՆԱՏՕ-ի համար վերածվել է թնդանոթի մսի արտադրամասի։ ՆԱՏՕ-ի անդամ շատ երկրներ իրենց զինծառայողներին չեն ուղարկում Աֆղանստան, մինչդեռ մեր երեխաների հետ նման կերպ վարվում է Սաակաշվիլին։ Դրանով նա ցանկանում է պահպանել իր իշխանությունը։
Մենք պահանջում ենք, որպեսզի ՆԱՏՕ-ն չօգտվի վրացի ժողովրդի անհաջողությունից և հրաժարվի իր օպերացիաներում վրացի զինծառայողներին ներգրավելուց»։
