Մարմնավաճառության հետ կապ ունենալու կասկածանքով փետրվարի 21-ին ձերբակալված Արժույթի միջազգային հիմնադրամի նախկին տնօրեն Դոմինիկ Ստրոս Կանը ազատ է արձակվել: Ինչպես հաղորդում է Agence France-Presse –ը՝ վկայակոչելով հետաքննությանը մոտ կանգնած աղբյուրներին, նրան ազատ են արձակել երկօրյա հարցաքննությունից հետո:
Գործակալությունը նշում է, որ Ստրոս Կանը չի հերքել, որ ներկա է եղել երիտասարդ կանանց մասնակցությամբ խրախճանքներին, սակայն նշել է, թե չի իմացել, որ այդ կանայք մարմնավաճառներ են:
Ստրոս Կանը հաջորդ հարցաքննությանը պետք է ներկայանա մարտի 28-ին:
Բացի այդ, մարտի 15-ին Նյու Յորքում սկսվում են Ստրոս Կանի դեմ նյույորքյան Sofitel հյուրանոցի սպասուհի Նաֆիսատու Դիալոյո քաղաքացիական հայցի նախնական լսումները:
Դոմինիկ Ստրոս Կանը ձերբակալվել է փետրվարի 21-ին Ֆրանսիայի Լիլ քաղաքում: Նրան կանչել են հարցաքննության՝ հանցավոր ցանցի գործով, որը Լիլի Carlton հյուրանոցից մարմնավաճառներ է մատակարարել բարձրաստիճան անձանց երեկույթներին: Սկզբնապես Ստրոս Կանն այդ գործում հանդես էր գալիս որպես վկա, սակայն հետագայում քննիչները որոշել են, որ նա իմացել է մարմնավաճառների կազմակերպված մատակարարումների մասին: Ավելին՝ կասկածներ կան, որ խրախճանքների մասնակիցները սեքս-ծառայությունների համար վճարել են կորպորատիվ և հասարակական միջոցներից:
