«Պարզվում է լեհ պրոֆեսոր Ալեքսանդր Սկոտնիցկու հավաքածուում գտնվող Ֆրեդերիկ Շոպենի դիմանկարը ժամանակին կախված է եղել Օսվենցիմում: Այս մասին նկարի տերը իմացել է 2012 թվականի հունվարին՝ համակենտրոնացման ճամբարից ազատագրվելու 67–րդ տարելիցից մի քանի օր առաջ»,– հաղորդում է Reuters-ը:
Կոմպոզիտորի դիմանկարը, որը 1943 թ. նկարել է լեհ նկարիչ և Օսվենցիմի գերի Մեչիսլավ Կոշչելնյակը, համարվում էր կորած: Կոշչելնյակի աշխատանքների մեծ մասը ոչնչացվել է նացիստների կողմից, որոնք ճամբարը լքել էին խորհրդային զինվորների հարձակումից հետո: Փրկված նկարները, որոնցում պատկերված է ճամբարի կյանքը, գտնվում են Աուշվիցի թանգարանում:
Ինչպես նշում է գործակալությունը, պրոֆեսորը հասկացել է, թե իր մոտ գտնվողն ինչ դիմանկար է, երբ կարդացել է Կոշչելնյակի մասին գիրքը: Այնտեղ նա գտել է դիմանկարի նկարագրությունը, որի անկյունում կա ստորագրություն` MK և ստեղծման տարեթիվը: Սկոտնիցկին պատմել է, որ այս դիմանկարը ստացել է իր քարտուղարուհուց, որն էլ իր հերթին ստացել էր նացիստների ռազմական հանցագործությունների հետաքննության հանձնաժողովից:
Դիմանկարը կախված է եղել Օսվենցիմի շենքերից մեկում, որտեղ ճամբարի ձերբակալվածների նվագախմբի փորձերն են տեղի ունեցել: Սրահը գեղեցիկ զարդարված է եղել, քանի որ այդտեղ նվագախումբը ճամբարի ղեկավարների հյուրերի համար համերգներ է տվել:
Կոշչելնյակի որդին չի իմացել Շոպենի դիմանկարի գոյության մասին: Նրան հայտնի է եղել միայն, որ իր հորը պատվիրել են նկարել գերմաներեն խոսող մի քանի կոմպոզիտորների դիմանկարներ: