Լուսնային օրացույցով Նոր տարին (Սագաալգան-Սպիտակ ամիս) բուդդիստները նշում են չորեքշաբթի օրը` փետրվարի 22-ին:
Համաձայն բուդդայական լեգենդի` Նոր տարուն վաղ առավոտյան յուրաքանչյուրի տուն է մտնում Բալդան Լխամո աստվածուհին, և այդ ժամանակ արթնացողները նրա պաշտպանությունն են ստանում:
Հաջորդող երկու օրերին շատ բուդդիստներ հատուկ ծիսակատարություններ են անում` բաց են թողնում «հաջողության քամու ձիերին», տան տանիքներին և ծառերին կախում են լամայի կողմից օծված դրոշներ, ինչը կապված է բարեկեցության հետ:
Սագաալգանը տիբեթական բուդդայականության մեջ տարվա 6 կարևոր տոներից առաջինն է:
Սագաալգանը սկսվում է Սպիտակ ամսվա առաջին ամսաթվի արևածագին, որն այս տարի համընկնում է փետրվարի 22-ի հետ: Բուդդիստներն արևածագն ավանդաբար որոշում են «ձեռքի ափի գծերով». երբ բոլոր գծերը դառնում են տեսանելի, ուրեմն արդեն լուսաբաց է: Սակայն գործնականում Նոր տարին դիմավորում են առավոտվա ժամը վեցին:
Նոր տարվա առաջին օրերին ընդունված է հյուր գնալ: Որպես կանոն՝ կրտսերները գնում են ավագների մոտ և նրանց նվերներով շնորհավորում:
Յուրաքանչյուր Սագաալգանի ժամանակը որոշում են բուդդիստ աստղագետները: