Համաձայն փորձագետների՝ մայրերը, որոնք պայքարում են իրենց երեխաներին քնեցնելու համար, պետք է նկատի ունենան, թե որքան կոֆեին են սպառում օրվա ընթացքում:
Սուրճ կամ թեյ ըմպելիս և նույնիսկ շոկոլադ ուտելիս արյան տոնուսը բարձրանում է: Սակայն դրա հետևանքով երեխաները կարող են անհանգիստ, դյուրագրգիռ դառնալ և չքնել, քանի որ այդ ամենը նորածնին է փոխանցվում մայրական կաթի միջոցով: Կրծքով սնուցման բժշկական ամսագրի խմբագիր, բժիշկ Ռութ Լորենսն ասում է, որ նորածինները դժվարանում են այն դուրս բերել իրենց օրգանիզմից՝ հատկապես կյանքի առաջին 2 շաբաթում: Սա կարող է կուտակվել և հանգեցնել բացասական ախտանիշերի:
«Սովորաբար մայրերը, հատկապես կրծքով կերակրողները, պետք է սահմանափակեն կոֆեինի չափը»,- ասել է նա կոֆեինի հետազոտությունների տեղեկագրում:
Նյու Յորքի Ռոչեստր համալսարանի պրոֆեսորներից մեկն ավելացրել է, որ մայրերը ընդհանրապես պետք է խուսափեն այն ամենից, ինչը կարող է ավելացնել կոֆեինի մակարդակն օրգանիզմում:
Սակայն հարց է առաջանում՝ նվազագույնը քանի՞ բաժակ սուրճ է կարելի ըմպել օրվա ընթացքում: Ըստ բժիշկ Լորենսի՝ դա կախված է անհատից, քանի որ որոշ մարդիկ ավելի զգայուն են, քան մյուսները:
Որպես ընդհանուր պրակտիկա՝ մայրերին խորհուրդ է տրվում ընդունել 300 միլիգրամից ոչ ավելի կոֆեին, որը համարժեք է 1 օրվա ընթացքում 3 գավաթ սուրճին:
