Իրանական Fars News գործակալության փոխանցմամբ՝ Իրանն ԱԷՄԳ-ի գլխավոր տնօրեն Յուկիա Ամանոյին, որը ԱԷՄԳ-ի բարձրաստիճան պատվիրակության իրանական այցը որակել է որպես տապալված, մեղադրել է իր միջուկային ծրագիրը վարկաբեկելու մեջ: Ամանոն դժգոհել էր, որ ԱԷՄԳ-ի ներկայացուցիչներին թույլ չէր տրվել ներթափանցել Իրանի միջուկային օբյեկտներ:
Իրանական ԶԼՄ-ները հիշեցնում են, որ WikiLeaks-յան բացահայտումներում Ամանոն որակված է որպես ԱՄՆ-ի շահերի կողմնակից ու դրանք առաջ տանող: Նրանք հավելում են, որ Ամանոյի հայտարարությունից չի հասկացվում՝ արդյոք ԱԷՄԳ-ը պլանավորո՞ւմ է հետագայում պատվիրակություն գործուղել Իրան, թե՞ ոչ:
ԱԷՄԳ-ում Իրանի ներկայացուցիչ Ալի Ասղար Սոլթանիեն հայտարարել է, որ շարունակվելու է Իրանի ու ԱԷՄԳ-ի միջև համագործակցությունը:
Հիշեցնենք, որ նախորդ տարվա նոյեմբերի կեսերին Սոլթանիեն ԱԷՄԳ-ին մեղադրել էր Իրանի հանդեպ ստանձնած պարտավորությունների չիրագործման մեջ, ինչի արդյունքում ֆիզիկական ոչնչացման սպառնալիքի տակ են հայտնվել երկրի ատոմագետ ֆիզիկոսներն ու երկրի միջուկային օբյեկտները։
