Սերժ Սարգսյանը երեկ հրամանագիր է ստորագրել, որով արդարադատության գեներալ-մայորի կոչում է շնորհվել Դատական ակտերի հարկադիր կատարման ծառայության պետ Միհրան Պողոսյանին, որը հայտնի է որպես Քեթրինի Միհրան: Միհրան Պողոսյանը, սակայն, ավելի հայտնի է, այսպես ասած, «անձնական արդարադատության» մեթոդիկայի հաճախակի կիրառմամբ, երբ ինքնադատաստան է տեսնում իր հետ խնդիրներ ունեցող մարդկանց հետ: Մասնավորապես, հենց դրանցից մեկի համար էլ աշխատանքից ազատվեց արդարադատության նախարար Գևորգ Դանիելյանը:
Եթե հիշում եք, Դանիելյանին հեռացրին աշխատանքից, որովհետև Միհրան Պողոսյանը մարդ էր ծեծել իր աշխատասենյակում, իսկ Դանիելյանը նրան չէր պատժել, թեև պատժելու հանձնարարություն էր ստացել վարչապետից: Այդ մասին հենց ինքը վարչապետը հրապարակավ հայտարարեց:
Այսինքն` Միհրան Պողոսյանը մարդ էր ծեծել, իսկ նրան չպատժելու համար աշխատանքից հեռացվեց Գևորգ Դանիելյանը: Միհրան Պողոսյանին, փաստորեն, ոչ միայն ոչ մի պատիժ չհասավ, այլև նա ներկայումս Սերժ Սարգսյանի ձեռամբ դառնում է արդարադատության գեներալ-մայոր: Ինչպես ասում են, ասա՝ ովքեր են քո արդարադատության գեներալ-մայորները, ասեմ՝ ինչ արդարադատություն դու ունես: Իսկ առկա իրավիճակում կարելի է նաև ասել հետևյալը. ասա՝ ում ես շնորհում արդարադատության գեներալ-մայորի կոչում, և ասեմ, թե ինչ արժեք ունեն երկրում արդիականացման, բարեփոխումների կուրսի մասին քո հրապարակային հայտարարությունները:
Խոսքն, իհարկե, այդ մասին պարբերաբար հիշեցնող Սերժ Սարգսյանին է վերաբերում, որը Միհրան Պողոսյանի նման «օդիոզ» կերպարին շնորհելով նման բարձր կոչում, իրականում գործնական առումով ցույց է տալիս, թե ովքեր են շարունակում իշխանության մեջ մնալ գնահատված և պահանջված: Դե իսկ այդ դեպքում արդեն ավելորդ գուշակություններ չեն պահանջվում հասկանալու համար, որ բարեփոխում ասվածը Հայաստանում ոչ միայն մոտ չէ, այլև չափազանց հեռու է իրականությունից, և այն ամենը, ինչ հնչում է Սերժ Սարգսյանի ելույթներում, ընդամենը բառեր են, որոնք իրենց տակ չունեն անկեղծության քիչ թե շատ էական չափաբաժին:
