Ոչ մի երաշխիք չկա, որ քրեակատարողական հիմնարկներում ինքնասպանություններ չեն լինի: «Առաջին լրատվական»-ի հետ զրույցում նման տեսակետ հայտնեց Քրեակատարողական հիմնարկներում դիտորդություն իրականացնող խմբի անդամ Էդմոն Մարուքյանը` խոսելով քրեակատարողական հիմնարկներում միջադեպերի դեմ լուծում գտնելու շուրջ:
Նա նշեց, որ դիտորդական խումբն անընդհատ ահազանգում է քրեակատարողական հիմնարկներում առկա խնդիրների վերաբերյալ: Բազմաթիվ անգամներ դիտորդական խմբի անդամները դիմել են Արդարադատության նախարարությանը տարբեր խնդիրների վերաբերյալ, սակայն նրանց պատասխանել են, որ նախագիծ է կազմվում այս ոլորտում բարեփոխումներ իրականացնելու վերաբերյալ: «Մինչև բարեփոխումներ տեղի կունենան, ծանր հիվանդությամբ տառապող դատապարտյալները չեն կարողանում նման պայմաններում իրենց պատիժը կրել, հնարավոր չէ պարզապես: Մեկը կարող է կամքից ուժեղ լինել և դիմանալ, իսկ մյուսը`ոչ: Որևէ կերպ երաշխավորված չէ, որ վիճակն այսպես շարունակվի, նրանց ճակատագրի վերաբերյալ որոշում չկայացնեն, ինքնասպանություններ չեն լինի»,- նշեց Է. Մարուքյանը`տեղեկացնելով, որ դիտորդական խմբի առաքելությունը դիտորդություն իրականացնելն ու արձանագրած խնդիրները բարձրաձայնելն է:
Ըստ նրա` եթե չլիներ դիտորդություն, նույնիսկ հայտնի չէր դառնա, որ այս կամ այն դատապարտյալը հիվանդություն ունի: Է. Մարուքյանի խոսքով` վերահսկողության շնորհիվ խնդիրները վեր են հանվում, ներկայացվում թե համապատասխան մարմինների, թե հասարակության դատին: «Մենք պայքարում ենք, անընդհատ ահազանգելով այս խնդիրների մասին, բայց եթե չի լուծվում ու մարդն ինքնասպան է լինում դրա վերաբերյալ առանձին մեր մտահոգությունն ենք բարձրաձայնում»,- ասաց դիտորդական խմբի անդամը`հիվանդությամբ տառապող դատապարտյալների լուծումը համարելով նրանց պատժից ազատելն այն պարագայում, երբ նրանց հիվանդությունը նախատեսում է պատժի ազատում:
Հիշեցնենք, որ փետրվարի 20-ին ՀՀ արդարադատության նախարարության տեղեկատվական կենտրոնից հայտնել են, որ փետրվարի 18-ին, ժամը 05:00-ի սահմաններում մահացել է ՀՀ ԱՆ «Դատապարտյալների հիվանդանոց» քրեակատարողական հիմնարկում գտնվող 1960 թ. ծնված դատապարտյալ Հովհաննես Դոխոլյանը: Ըստ նախնական վարկածի՝ Դոխոլյանը հոսանքահարվելով ինքնասպան է եղել, իսկ մինչ ինքնասպան լինելը թողել է գրություն, հայտնելով, որ ինքը զզվել է ապրելուց: Հ. Դոխոլյանի առողջական վիճակի վերաբերյալ դիտորդների խումբը երեք հրատապ հաշվետվություն է ներկայացրել ՀՀ արդարադատության նախարարություն (2011 թ. հունիսի 9-ին, հուլիսի 22-ին և դեկտեմբերի 22-ին), հայտնելով, որ նա տառապում է պատիժը կրելուն խոչընդոտող ծանր հիվանդություններով: Սակայն առնվազն 7 ամիս հարցին լուծում չի տրվել:
