Եմենի հարավում ընտրական տեղամասերից մեկում տեղի ունեցած անարգությունների հետևանքով զոհվել է 4 մարդ:
Ինչպես հաղորդում է Gulfnews.com-ը, Ադանի ընտրատեղամասերից մեկում փոխհրաձգություն է սկսվել ոստիկանության աշխատակիցների և Եմենի հարավի անջատողական շարժումների կողմնակիցների միջև, ինչի հետևանքով զոհվել է տասնամյա մի երեխա: Մեկ այլ շրջանում փոխհրաձգության հետևանքով ոստիկան է զոհվել:
Երկրի հարավ-արևելքում՝ Ալ-Մուկալլա քաղաքում, ևս մեկ ընտրատեղամաս է գնդակոծվել, որի հետևանքով զոհվել է մեկ զինծառայող: Նմանօրինակ պատահարի զոհ է դարձել ևս մեկ մարդ Եմենի հարավային մեկ այլ շրջանում:
Անջատողական շարժումները, որոնց անդամները ձգտում են առանձնացնել երկրի հարավը Սանայից, այսօր հայտարարել են «քաղաքացիական անհնազանդության օր»: Նախագահական ընտրությունների առաջին իսկ ժամերին գրանցվել է ընտրատեղամասերի հրդեհման մի քանի փորձ:
Այսօր մոտ 30 տարի ընդմիջումից հետո Եմենում ընթանում են ոչ այլընտրանքային նախագահական ընտրություններ: Երկրի նախագահի պաշտոնի միակ թեկնածուն փոխնախագահ Աբդ Ռաբբու Մանսուր Հադին է:
