Ճգնաժամային իրավիճակի առաջացման դեպքում Հայաստանը կստանա անհրաժեշտ ֆինանսական օգնությունը. այսպիսի հայտարարություն է արել Հավաքական անվտանգության պայմանագրի կազմակերպության գլխավոր քարտուղար Նիկոլայ Բորդյուժան:
«Հայաստանը ՀԱՊԿ լիիրավ անդամ է՝ իր պարտավորություններով և իրավունքներով, իր հնարավորությունները մյուս պետությունների հավաքական անվտանգության համար տրամադրելու պարտավորություններով և մյուս դաշնակիցներից նույնպիսի օգնություն ստանալու իրավունքներով»,- ասել է Բորդյուժան մամուլի ասուլիսում՝ պատասխանելով RIA-Novosti-ի թղթակցի այն հարցին, թե ինչպես կվարվի ՀԱՊԿ-ը ղարաբաղյան հակամարտության կողմերի միջև ճգնաժամային իրավիճակի առաջացման դեպքում:
Նրա խոսքերով՝ այսօր կանխատեսել ՀԱՊԿ անդամ երկրներում այս կամ այն ճգնաժամային դրության զարգացումը անհնար է:
«Տարբերակներ կան՝ ինչպես եղել է Ղրղըզստանում, տարբերակներ կան՝ ինչպես է զարգացել ճգնաժամային դրությունը Բելառուսում, կամ Ռուսաստանում, կամ Ղազախստանում: Ամեն ինչ կախված է գործողությունների կոնկրետ ֆորմատից, որը կառաջանա այս կամ այն պետությունում: Դրանից ելնելով միայն որոշումներ կկայացվեն»,- ասել է նա:
Բորդյուժան ավելացրել է, որ օպերատիվ արձագանքման համընդհանուր ուժերից բացի՝ ՀԱՊԿ-ն ունի իրավիճակի վրա ազդելու քաղաքական և խաղաղապահական հնարավորություն:
«Մենք պոտենցիալ ունենք՝ կապված օպերատիվ ստորաբաժանումների կիրառման հետ՝ ի հակակշիռ իրադարձությունների, կապված ահաբեկչության և նարկոմաֆիայի գործունեության, ինչպես նաև տեղեկատվական անվտանգության և միգրացիայի ոլորտում հանցագործ խմբավորումների հետ»,- ավելացրել է Բորդյուժան:
«Բայց կրկնում եմ ևս մեկ անգամ. Հայաստանը կստանա անհրաժեշտ ամբողջ օգնությունը՝ որպես ՀԱՊԿ լիիրավ անդամ»,- եզրափակել է նա:
