Արժույթի միջազգային հիմնադրամի նախկին տնօրեն Դոմինիկ Ստրոս Կանը, որն անցյալ տարվա մայիսին հրաժարական տվեց հյուրանոցի սպասուհու բռնաբարության համար իր շուրջ ծավալված սկանդալի պատճառով, դարձյալ ձերբակալվել է, այս անգամ մարմնավաճառության գործով, հաղորդում է RIA-Novosti-ն:
Ավելի վաղ Լիլլում սկսվել էր Ստրոս Կանի հարցաքննությունը. նա կասկածվում է հայտնի մարմնավաճառական ցանցի հետ համագործակցելու մեջ: Հարցաքննության ժամանակ Ստրոս Կանը հայտարարել է, որ «հագեցած սեռական կյանք» է վարել և ներկա է եղել մարմնավաճառների մասնակցությամբ երեկույթներին: Սակայն Ստրոս Կանը պնդում է, որ չի իմացել, որ աղջիկները հայտնի ընդհատակյա մարմնավաճառական ցանցի աշխատողներ են եղել:
Գործակալությունը նշում է, որ Ստրոս Կանին ձերբակալել են հարցաքննության ժամանակ, որի ավարտից հետո նրա դեմ, հնարավոր է, մեղադրանք ներկայացվի: Այդ դեպքում Ստրոս Կանին սպառնում է 7 տարվա ազատազրկում և 375 հազար եվրո տուգանք:
