Հոլիվուդյան աստղը դեմ է արտահայտվել ՄԱԿ-ի հեթական բանաձևի վրա վետո դնելու որոշմանը: Ինչպես հաղորդում է 1news.az-ը, հղում անելով արտասահմանյան ԶԼՄ-ներին, հայտնի դերասանուհի, ռեժիսոր, ինչպես նաև ՄԱԿ-ի բարի կամքի դեսպան Անջելինա Ջոլին միջազգային հանրությանը կոչ է արել միջամտել Սիրիայում երկարատև հակամարտությանը և քննադատել է այն պետությունների դիրքորոշումը, որոնք խոչընդոտում են երկրում իրադրության կարգավորմանը:
«Կարծում եմ՝ Սիրիան հասել է այն կետին, երբ այլ պետությունների միջամտությունն անհրաժեշտություն է»,- ասել է դերասանուհին՝ Բոսնիա այցելության ժամանակ: Ջոլին հայտարարել է, որ ինքը դեմ է «այն երկրներին, ովքեր չմիջամտելու դիրքորոշում են ընդունել` այդ կերպ խոչընդոտելով ՄԱԿ-ի խաղաղապահների գլոբալ ջանքերին»: «Ես վստահ եմ, որ վետոյի իրավունքի օգտագործումն այն երկրների կողմից, որոնք Սիրիայի հանդեպ ունեն ֆինանսական հետաքրքրություն, հարցականի տակ պետք է դրվի: Այդ արգելքը խոչընդոտում է օգնել մարդասիրական օգնության կարիք ունեցող մարդկանց»,- նշել է Ջոլին:
