Նորվեգական ԶԼՄ-ները հրապարակել են ահաբեկիչ Անդերս Բրեյվիկի կողմից կազմված զոհերի ցուցակը: Ինչպես հաղորդում է ITAR-TASS-ը, դրանում նշված են քաղաքական և հասարակական գործիչների անուններ, որոնց նա անվանում է «Հայրենիքի դավաճան»:
Բրեյվիկն իր ցուցակը բաժանել է տարբեր դասերի՝ կախված «վտանգավորության» աստիճանից: Սկզբում նա ցանկացել է հաշվեհարդար տեսնել արտգործնախարար Յոնաս Գար Սթյորեի հետ: Ցուցակում նրան հաջորդում են նախկին վարչապետ Գրու Հարլեմ Բրունթլանը, առևտրի և արդյունաբերության նախարար Թրոնդ Գիսկեն և մշակույթի նախարար Աննիկեն Ուիթֆելդը:
Բացի այդ, ահաբեկչի թիրախում են եղել Թագավորական պալատը, NRK հեռուստաալիքը, Amnesty International իրավապաշտպան կազմակերպությունը, Միջեկեղեցական խորհուրդը, թերթերի խմբագրություններ, Օսլոյի կառավարական թաղամասը, Նորվեգիայի աշխատավորական կուսակցության գրասենյակը, նավթային հարթակներ, միջուկային ռեակտորներ և այլն:
Ոստիկանությունից հայտնել են, որ նման ցուցակ իրոք գոյություն ունի, սակայն իրենք չգիտեն՝ արդյոք Բրեյվիկը նախապատրաստե՞լ է նման մեծ ծավալի ահաբեկչություն, թե՞ պարզապես մտածել է այդ մասին:
Հիշեցնենք, 2011 թ. հուլիսի 22-ին Անդերս Բրեյվիկի կողմից Նորվեգիայում իրականացված կրկնակի ահաբեկչության հետևանքով զոհվեց 77 մարդ:
Բրեյվիկի գործով դատավարությունը կսկսվի ապրիլի 16-ին:
