Արևադաշտի գյուղապետի ժամանակավոր պաշտոնակատար Հովսեփ Օհանյանը, անդրադառնալով հունվարի 9-ին կայանալիք գյուղապետի ընտրություններին, նշեց, որ իր շանսերը լավ է գնահատում։ «Ճիշտն ասած, ես չեմ կարող ասել, թե քանի տոկոս ձայն կհավաքեմ, քանի որ միշտ իմ դիմացինին ավելի ուժեղ եմ գնահատում, քան ինձ։ Համենայնդեպս չէի ասի, թե հավասարազոր ուժեր ունենք, իզուր չէ, որ դուրս եմ եկել պայքարի։ Հետո, ես չեմ դուրս եկել պայքարի, Արամ Ղազարյանն է դուրս եկել իմ դեմ։ Ես ինքնահոս կերպով եմ դարձել Արևադաշտ գյուղի գյուղապետի ժամանակավոր պաշտոնակատար։ Համենայդեպս, իմ շանսերը անհամեմատ լավ են»,- նկատեց Հովսեփ Օհանյանը։ Մեր հարցին՝ նա անդամագրվե՞ց հանրապետական կուսակցությանը, թե՞ ոչ, պատասխանեց. «Ես կուսակցական չեմ, պարզապես կռված երկրապահ տղա եմ` մեդալներով, պատվոգերով։ Հայրենիքի նվիրյալներից մեկը ես եմ։ Ճիշտն ասած, հանրապետական կուսակցությանը անդամագրվելու ցանկությունը առաջացով վերջին շրջանում, բայց մտածեցի, որ անդամագրումս քաղաքական այլ երանգներ կստանա։ Սակայն իրականում եղել եմ այդ կուսակցության կողքին՝ որպես ազգի նվիրյալ, բարձրագույն կրթություն ունենալով, հասկանում եմ, որ այսօր իշխանության գլուխ ինքն ա, իսկ ես պարզ է, որ իշխանության գլուխ կանգնած մարդ եմ, և պատահական չէ, որ ձգտում եմ դրան։ 84 թվից աշխատել եմ ղեկավար պոստերում»։ Հիշեցենք, որ Արևադաշտի մյուս թեկնածուն Արմավիրի մարզպետարանի աշխատակազմի ֆինանսական վարչության պետ Արամ Ղազարյանն է, որը պաշտոնապես հարում է հանրապետական կուսակցությանը։ Ստացվում է, որ երկու թեկնածուներն էլ հանրապետական կուսակցության համակիրներ են, պարզապես մեկը՝ պաշտոնապես, իսկ մյուսը՝ հոգեպես։ Արձագանքելով սրան՝ Հովսեփ Օհանյանը ավելացրեց. «Իմ մրցակիցը երկար տարիներ եղել է մեր Բաղրամյանի շրջանի ՀՀՇ-ի նախագահ, իսկ ինձ, որպես զինվորագրված զինվոր, տասնյակ անգամ ուղարկել է Ղարաբաղ՝ առաջին գծերում կռվելու, բայց ինքն անմիջական մասնակցություն չի ունեցել։ Չնայծ ֆինասավորել է մեզ, բայց միշտ մնացել է 4-րդ «լինիայում»,- եզրափակեց Արևադաշտի գյուղապետի պաշտոնակատար Հովսեփ Օհանյանը։