2011 թ. 2010-ի համեմատ մեր երկրից պանրի արտահանումն աճել է մոտ 120 տոննայով: Սակայն, ինչպես «Առաջին լրատվական»-ի հետ զրույցում պարզաբանեց Պանրագործների ասոցիացիայի տնօրեն Արմեն Գիգոյանը, արտահանվում է 2 տեսակի պանիր՝ զտած, որը որպես հումք է արտահանվում, և նորմալ, վերջնական արտադրանքի տեսքով: Աճը եղել է վերջինի մասով:
Պետական եկամուտների կոմիտեի մաքսային ծառայության հրապարակած ցուցանիշների համաձայն՝ 2011 թ. Հայաստանից արտահանվել է 439.8 տոննա պանիր և կաթնաշոռ՝ 2010-ի 496.4 տոննայի փոխարեն: Այս շուրջ 56 տոննայի նվազումը Ա. Գիգոյանը բացատրեց այսպես. «Եթե թվերի մեջ նվազեցում է եղել մոտ 60 տոննայի, դրան գումարած արտահանման ավելացումը՝ 120 տոննա, ապա 180 տոննա ավելի քիչ զտած պանիր է արտահանվել, քան նախորդ տարի: Պարզապես անցած տարի զտած պանրի, որն օգտագործվում է հալած պանրի հումքի համար, պահանջարկը նվազել է»:
Ընդ որում՝ պատրաստի պանրի արտահանման ծավալների ավելացումը, Ա. Գիգոյանի խոսքով, լավ կատարված աշխատանքի արդյունք չէ, այլ պատճառն այն է, որ Հայաստանում անցած տարի պանիր շատ է արտադրվել, ինչը և սպասվում էր, ունեցել ենք բարձր ինքնարժեքով ցածր լիկվիդային ապրանք: Հայաստանի քաղաքացիները սպառում են սահմանափակ քանկությամբ պանիր՝ մինչև 20 հազար տոննա, և ըստ Ա. Գիգոյանի՝ ավելցուկն էլ արտահանվել է: Հայաստանից պանիր արտահանվում է հիմնականում ՌԴ, և շատ սահմանափակ քանկությամբ ԱՄՆ՝ առավելագույնը 50 տոննա:
Ասոցիացիայի տնօրենը հայտնեց, որ ներկայում բանակցություններ են տարվում ռուսական մի ընկերության հետ. «Պահանջները իրոք լուրջ են, մեծ քանակների մասին է խոսքը՝ տարեկան 2 հազար տոննայի: Մեզ էլ օգնող չկա: Մտածում ենք համաձայնենք, թե ոչ: Լուրջ ներդրումներ են պետք՝ մոտ 1.5 մլն դոլար: Ու թեև 3 տարում պետք է ծավալները հասցվեն 2 հազար տոննայի, պետք է սկսենք 500 տոննայից, բայց 3 տարին էլ սեղմ ժամկետ է: Առաջիկա ընտրություններն էլ գուցե խանգարեն, գուցե և օգնեն բանակցություններին»:
Նրա խոսքով՝ Հայաստանն ի վիճակի է 2-3 հազար տոննա արտահանել, և կաթի գների բարձրացումը դրական ազդեց ոլորտի վրա: «Չկա չարիք առանց բարիքի, հասկացանք, որ կարող ենք շատ արտադրել, քանի որ հումքի բազան՝ կաթը, շատանում է: Մարդիկ կով են գնում, չեն մորթում կաթնատուներին, դրսից են բերում և միտում կա ավելացման: Կառավարությունն անընդհատ ասում է կօգնենք, բայց 1 դրամ անգամ դեռ չի օգնել»,- նշեց Ա. Գիգոյանը:
