ՍԴՀԿ ատենապետի վիճարկումները մի ամբողջ կառույցի նկատմամբ գիտակցված ոտնձգություն են: «Առաջին լրատվական»-ի հետ զրույցում նման տեսակետ հայտնեց ՍԴՀԿ ատենապետ Լյուդմիլա Սարգսյանը` անդրադառնալով ՍԴՀԿ ատենապետի պաշտոնի վիճարկումներին:
Ըստ Լ. Սարգսյանի` այս վիճարկումները քաղաքական ճնշում են ՍԴՀԿ նկատմամբ, որ փորձում են իրականացնել, խեղաթյուրել իրական փաստերը, հասարակությանը գցել մոլորության մեջ, ինչպես նաև նախընտրական նպատակներ հետապնդել: «Ես երեկ եմ իմացել, որ Հայաստանում գործող Սոցիալ-դեմոկրատ հնչակյան կուսակցության անունից դեկտեմբերի 20-ից հետո «Հայոց աշխարհ»-ում հայտարարություն է տրվել համագումարի մասին: Ամեն բան սկսվել է այդտեղից, իսկ այդ համագումարի պատասխանատուին պետք է պատասխանատվության ենթարկել, որ նա այդ ՍԴՀԿ-ի անվան տակ հայտարարություն է արել: Վերջին հաշվով հստակեցնենք. եթե մեր անունից հայտարարություններ են արվել, մենք ինչո՞ւ այդ համագումարին ներկա չենք եղել կամ ինչո՞ւ տեղյակ չենք եղել դրանից»,- մեկնաբանեց Լ. Սարգսյանը`հավելելով, որ պետք է ուղիղ պատասխանատվության ենթարկել Պերկուպերկյանին, Վահան Շիրխանյանին և մյուս կազմակերպիչներին:
Նրա համոզմամբ` նրանք այսօր ոտնահարել են ՀՀ կուսակցությունների մասին օրենքը, փորձել են կեղծիքով գրանցվել պետռեգիստրում: Լ. Սարգսյանը նաև կարծում է, որ այս օրինակը դաս պետք է լինի բոլորին, որպեսզի մյուս անգամ որևէ մեկը մարդու իրավունքների նկատմամբ նման ոտնձգություն չկատարի: «Սա մի բացառիկ երևույթ է: Մեկ կուսակցության անվան տակ փորձել մեկ այլ կուսակցություն գրանցել, դա մի ամբողջ կառույցի խնդիր է, մի մարդու երևույթ չէ»,- նշեց Լ. Սարգսյանը:
Հիշեցնենք, որ կուսակցության ատենապետ ճանաչված Լյուդմիլա Սարգսյանից Գևորգ Պերկուպերկյանը պահանջում է վերադարձնել կուսակցության փաստաթղթերը, դրոշը, կնիքն ու արխիվը` պնդելով, թե ինքն է ընտրված նոր ատենապետը:
