Ֆրանսիայի նախագահ Նիկոլա Սարկոզին այսօր ներկայացրել է իր նախընտրական շտաբը: Ելույթ ունենալով նախընտրական կենտրոնի բացմանը` Ֆրանսիայի գործող նախագահը հավաստիացրել է, որ ինքը մտադիր է նախագահական մրցավազքին մասնակցել «21-րդ դարի խմբով»:
Ինչպես հաղորդում է ИТАР-ТАСС գործակալությունը` հարյուրավոր մարդիկ էին եկել Փարիզի 15-րդ թաղամասում գտնվող շենքի մոտ, որտեղ մոտակա երկու ամիսների ընթացքում տեղակայված կլինի Սարկոզիի նախընտրական շտաբը:
Ինչպես ընդգծել է նախագահը, ֆրանսիական մայրաքաղաքի հարավ-արևմտյան մասը պատահականորեն չի ընտրվել: «Տեղի բնակչությունն առաջին հերթին միջին դասն է: Հենց նրանց եմ ես ցանկանում դիմել» ,- մեկնաբանել է նախագահը:
Սարկոզիի խոսքերով` ինքը մտադիր է շտաբ այցելել օրը երկու անգամ` առավոտյան աշխատանքի մեկնելուց առաջ և օրվա երկրորդ կեսին:
Առաջին զանգվածային ցույցն ի պաշտպանություն Սարկոզիի` տեղի կունենա Մարսելում, կիրակի օրը:
Պլանավորվում է նախագահական ընտրությունների առաջին փուլն անցկացնել ապրիլի 22-ին:
