Մեդիամագնատ Ռուպերտ Մերդոկը հայտարարել է, որ իր News International ընկերությունը շուտով Մեծ Բրիտանիայում կսկսի հրատարակել նոր կիրակնօրյա Sun on Sunday թերթը՝ News of the World-ի փոխարեն: Ինչպես հաղորդում է 1news.az-ը, հղում անելով արտասահմանյան ԶԼՄ-ներին, այս մասին Մերդոկն ուրբաթ օրը հայտարարել է Լոնդոնի News International-ի շտաբ-գրասենյակում: «Մենք կկառուցենք նոր թերթ՝ The Sun թերթի արժանիքների և հայտնիության հիման վրա»,- ասել է Մարդոկը:
Հիշեցնենք, որ թերթը փակվել էր անցած տարի՝ լրագրողների կողմից ճանաչված մարդկանց հեռախոսազրույցները լսելու սկանդալի պատճառով: Սքոթլանդ-Յարդը հունվարի վերջին ձերբակալել էր News International ընկերության չորս լրագրողի և ոստիկանության մեկ սպայի: Մերդոկը հայտարարել էր, որ Լոնդոնում կմնա մի քանի շաբաթ, որպեսզի իր հրատարակության ձերբակալված լրագրողներին ցուցաբերի բոլոր անհրաժեշտ օգնությունները:
«Մենք մեզնից կախված ամեն ինչ անում ենք , որպեսզի օգնենք նրանց, ովքեր ձերբակալված են: Յուրաքանչյուրն անմեղ է, քանի դեռ մեղքն ապացուցված չէ: Մենք պատրաստ ենք նրանց մեզ մոտ կրկին աշխատանքի ընդունել»,- հավելել է Մերդոկը:
