Եթե անգամ Ֆրանսիայի Սահմանադրական խորհուրդը հակասահմանադրական ճանաչի Հայոց ցեղասպանության մերժումը քրեականացնող օրինագիծը, նրա այդ որոշումը պետք է որ շատ մեծ ազդեցություն չունենա հայ համայնքի տրամադրությունների վրա և չպիտի խոչընդոտի նրանց՝ նախագահական ընտրությունների ժամանակ Սարկոզիին իրենց ձայնը տալու: «Առաջին լրատվական»-ի հետ զրույցում ասաց Ֆրանսիայում լույս տեսնող «Նոր Յառաջ» թերթի լրագրող Տորք Դալալյանը:
«Սարկոզին մինչ այժմ ցույց է տվել հարցի շուրջ իր մտադրություններն ու պատրաստակամությունը՝ դրանով իսկ բարձրացնելով սեփական վարկանիշը: Նա փորձում է վճռականորեն պաշտպանել հայկական օրինագիծը, համեմատություններ ու ակնարկներ է անում Հոլոքոսթի օրինագծի հետ»,- ասաց նա:
Տորք Դալալյանի խոսքով՝ Ֆրանսիայի Սահմանադրական խորհուրդն անկախ մարմին է, ուղիղ կերպով չի ենթարկվում նախագահին, և Սարկոզին լծակներ չունի՝ ներազդելու վերջինիս վրա: «Միաժամանակ, չեմ կարծում, որ ֆրանսահայ համայնքի ձայները կարևոր են Սարկոզիի համար»,- ընդգծեց լրագրողը:
Հիշեցնենք, որ Ֆրանսիայի Սենատը հունվարի 23-ին Ցեղասպանության հերքումը քրեականացնող օրինագիծն ընդունել էր ձայների 127 կողմ, 86 դեմ հարաբերակցությամբ: Սակայն հունվարի 31-ին հայտնի էր դարձել, որ ֆրանսիացի 76 սենատորներ դիմել են Սահմանադրական խորհուրդ՝ պահանջելով սահմանափակել Հայոց ցեղասպանության ժխտման համար քրեական պատիժ սահմանող օրենքը:
